Hic filium procreauit, cui Dan nomen indidit, qui et Elatus vel Superbus est cognominatus. Huic successit in regno filius Frothj, qui et Senex dictus est. Post quem <Frithleuer>A filius regni suscepit gubernacula. Cuius filius extitit Frothj <hin>A Frithgothæ, qui et Largus dictus est, eo quod largitatem super omnem amplexus est virtutem; nam et aurum et argentum velut lutum | reputabat. Cui successit filius Ingeld nomine. <Post quem regnauit filius Olaus, cui successit Frothi filius.>A Post cuius tempora longo seculorum interuallo filius pa(tri nullus)A in regno successit, set filiarum nepotes, altera nempe parte regali stirpe editi. Qui proxime successit, Olaus, hic omnes circumiacentes regiones strenue subiugauit, adeo etiam vt vltra Danubium septem dietas triumphando pergeret. Verum ne fabulose vel mendaciter regum redarguar tempora continuare, quos tamen haut modico distare didici temporum interstitio, cum non pigritia verum potius referentis inopia multos illustres transcurrerim, diligenti relinquo indagandum successori, vt, quod ex ecclipsi <pretermisi>A memorie, sollicita suppleat inuestigatione.

Post hec | Siuardus, filius Regneri Lothbrogh, regnum inuasit Dacie, commissoque cum rege prelio regem interfecit et regnum obtinuit. Qui dum regno potiretur conquisito, regis <interempti>A filiam thoro sibi sotiauit. Quam dum more coniugali cognouisset, regis sciscitabatur filia, quo nomine proles nuncuparetur; cui respondens monuit rex, vt post partum cinguli sui genitrix memor existeret. Que dum partus tempus impleuisset, nodi alludens vocabulo Canutum appellauit, vt pote <primum soluto virginalis sui cinguli nodo, qui nostro vulgari knut appellatur, procreatum. Is>A primus in Dacia functus hoc nomine; et solus post Froti, quem supra meminimus, regali extitit oriundus prosapia. In cuius pueritia <Ennignup>A Sealendensis bondo custos [regni]A | regni fuit constitutus; vt autem prefati Canuti iuuentus adoleuit, regni sceptrum recepit. Successu temporum filium procreauit, quem Snio voluit nuncupari. Qui filium genuit, quem Clacharaldum appellauit. Huic successit filius et regni heres, Gorm Løghæ <, id est Deses, qui>A tantum delitiis et crapulis regalibus indulgebat. Cuius vxor illustris illa extitit regina, Tyræ videlicet, que Regni Decus est cognominata. Cuius gloriose laudis famam reticere non valeo. Solent enim illorum gesta recenseri, qui prestantioris sunt fame.