|CAP. I.
DE KANUTO MAGNO, LEGUM CASTRENSIUM SIVE CURIALIUM CONDITORE.

|Rex itaque Kanutus, Svenonis Tyvgescheg, Daniæ Regis, filius, cum avitis regnis provinciisque potitus esset; ab ultimâ Thyle usque ad Græcorum imperium, invicto quodam robore, ditionis suæ terminos magnificè dilatavit. Nam diffusæ magnitudinis potentiâ Magno fermè par Alexandro, Angliam, Norvagiam, Sclaviam, Finlandiam, omnesque circumjacentes regiones, suam in potestatem redegit, patrioque regno subjugavit. Unde factum, ut ad ipsius aulam viri bellicosi passim confluerent, qui ob virtutis & victoriæ famam, tanti Principis obsequio certatim se incunctanterque dediderunt. Numerosa itaque virorum militarium turba ad ipsius quidem regiam convênit: sed omnes tamen pari virtute nevtiquam excelluerunt.