IX.

Post mortem uero Kanuti tres filij eius regnare ceperunt; Sven, quem habuit de Aluia, regnauit in Normannia, Haroldus in Anglia, eciam filus Aluie, Hartha Knut in Dania, filius Ymme. Sub quo Willelmus post Auoconem predicavit. Iste Harthe Knut contra Haroldum fratrem suum, regem Anglie, a Dania veniens in Flandria classem adunauit; sed Haroldus morte preventus bellum diremit. <Ita>A Harthe Knut Daniam possidet et Angliam. Interea Sven obijt in Norvegia, frater Harthe Knut; tunc Normanni elegerunt Magnum, filium sancti Olavi a concubina.

Tunc Harthe Knut et Magnus, rex Norvegie, talem condicionem inter se fecerunt et super reliquias cum iuramento firmauerunt, ut, qui diutius uiueret, superstes regnum defuncti acciperet duoque regna quasi hereditario iure possideret. Sed non post multum temporis Harthe Knut obijt.

Cuius morte audita Magnus, non inmemor pacti, Daniam adijt manu magna et ualida. Cui occurrens Sven, regis Gambliknut ex sorore nepos, filius Estrid et Vlf, quem Gambliknut interfecit, tum nauali bello tum equis cum eo certauit; ad ultimum uictus in Scaniam fugit.

Qui cum Lundis prepararet iter suum, ut in Svethiam fugeret, ecce nuncij de Seland uenientes Magnum regem defunctum nunciant ei. Qui mox Seland reuersus, deinde a Fiunensibus et a Iutensibus ultro in regem electus, Daniam per multos annos strennue gubernauit et filios filiasque ex diuersis mulieribus procreauit. Cuius filij .V. omnes reges unusquisque post alium extiterunt; quatuor mors matura preuenit, licet satis regno et nomine digni fuerant. Sub quo Villelmus episcopus predicauit, uir strennuus uiribus et fortis, impetuosus et qui sola uirtute corporis debellaret potentes, <set>A et animi uirtute, nullique parcens iratus.

Cuius temporibus mater regis Svenonis Estrith ecclesie Roskildensi .I. mansos filio consenciente contulit, quos prescriptus episcopus sigillo et priuilegio ecclesie confirmauit. Nec multo post Villelmus obijt, cui gloriosus rex Sveno equiuocum suum et capellanum subrogauit, uirum quidem omni morum probitate clarissimum et omnium antecessorum longe optimum. Terror <erat>A male faciencium, remuneracio beniuolencium, pater patrie, <decus>A cleri et salus populi, egregius pietate et qui omnia uellet ad perfectum ducere.

Ipse Roskildensem ecclesiam fere ueluti a fundamento fundauit, quam egregia corona et marmoreis columpnis omnibusque ornamentis decorauit. Ipse claustrum lapideum fratribus construxit et, ut .XV. prebende essent, de mensa sua fratribus et ecclesie, quam in honore sancte Trinitatis consecrauit, addidit. Preterea monasterium Ringstathia in honore sancte Marie construxit, aliud Slagløsii.