Sub saxo puer insignis tumulatus eodem
Somnum dormitat mortis victurus in aevum
Regina matre natus, genitore Johanne,
Nomine Franciscus materno foedere dictus
Clausum dum ventre gestabant viscera matris
Egressus foret ut felix simul absque periclo,
Quem genetrix dedit incolumen per numina fausta
Numine divino Francisci voce citato
Sancti, qui nomen puer hinc sortitus et omen
Infans deprompsit veterum praeludia patrum
Criminis absque lue matris vestigia cursans,
constans et castus, puerorum tramitis exsors.
Indolis est almae iuvenis cunctis bene gratus,
Foedera virtutum tractatu pectoris hiscit
Militis extrema victoris stemmata gliscens.
Hostes prostravit navali caede triumphans
Mundani pelagi virtutum classe per undam.
Nam promissa datur vincenti laurea mundum,
Laetissime culmos frondet quae mente beata.
Quam puer hausturus letali peste peremptus
Tollitur hoc mundo rex aetheris orbe futurus,
Ceu regis proles, ornatum more vetusto
Clauditur at funus defunctum pulveris antro
Adiectus laevae genitoris regius infans,
Matris sed dextram nunc dormit natus ad oram
In medio positus natiuo jure parentum
In fratrum sacris simul ac tellure minorum
Anno milleno quingenteno simul XI,
Virginei partus mundi pro crimine passi
Prima quippe dei lucenti mensis Aprilis.
