|M. ANDREÆ WELLEIO SAXONIS INTERPRETI EXQUISITISSIMO OB DESIDERATÆ PAPIRI DETESTANDAM
CARITATEM NUNC MISERE SUOS LABORES TAM INDIGNE PERITUROS DEPLORANTI HOC CARMEN
AD SPEM EXEQUENDI OPERIS ET LIBERALIS CONSTANTIÆ IMPETUM
T. B. SCRIPSIT.
ERGONE Saxonis morientur scripta diserti
Deficiensque tibi tot fortia facta virorum
Deficere æternum cogat tam cara papirus?
Ergone perpetuis finientur cuncta tenebris,
Bellipotens multis quæ gessit Dania seclis?
Tot Reges fortesque duces tantosque gigantes
Holgeros Frothosque graues Risosque Rolandos
Parua subire iterum permittat cartula mortem?
Dij prohibete nefas, et vos prohibete puellæ,
Lintea quin potius vestris remouete lacertis
Et forte optatæ nunc conficienda papiro.
Ecce suos offert expansis Scania palmis
Artifices, patriæ pereat ne gloria gentis,
Sed prohibet duris inclusa pecunia vinclis
Nec sinit egregios lucem spectare labores.
O semper claris inuisa pecunia factis!
O semper rerum commixta pecunia satis!
