CÆLO dignus erit, zelo qui Cælica scrutans
Sidera, non Terris vitam traducit inertem.
Quod TYCHO perfusus Cælesti Numine præstas,
Despiciens hominum sordes pompasque caducas.
O DANÆ gentis lux, gloria, vera voluptas,
Vive, valeque DEO, cuius vestigia lustras
Mirandis radijs, et grato perficis Orbi;
Nunquam visa alijs, nunquam confecta labore
Tanto. Propterea te vasti Machina Mundi
Miratur, te laude vehet post Sæcula multa
Posteritas, st docta foret: te Occasus et Ortus,
Insignem meritis, indagine mentis acutâ
Præstantem celebrabit, Opus laudabit in Ævum
Artificem, dum Solis Equi, dum Luna superstes
Falcatas referet facies, dum Pontus et Aër
Numinis attollent laudes, quo Sidera constant.
DANIA donec erit, re, nomine, et omine felix:
Donec HVÆNNA suis fundis et gurgite multo
Extabit, loca læta videns, atque ore patente
Vicinas Vrbes, et dissita Regna salutat.
O DEVS, Astriferi sapiens fundator Olympi,
Custodire virum talem, vitaque beare,
Atque Astris inferre velis, qui Sidera scandit,
Nec Terrena facit magni, sublimia saltem
Mente agitat, vulgique volens commercia linquit.
O Generose Polî cultor TYCHO, vive valeque,
Te servante DEO cuius moderamine Cælum
Circuit, et vitæ percurritur Orbita nostræ.
MARTINVS PLECIVS. F.
