|EXEMPLAR LITERARVM ILLVSTRISSIMI PRINCIPIS WILHELMI HASSIÆ LANDTGRAVII AD NOBILISSIMVM DOMINVM HENRICVM RANTZOVIVM, DE COMETA ANNI 85, QUÆ EX PARTE OCCASIONEM PRÆBUERUNT ALIQUOT SUBSEQUENTIBUS.
WILHELM VON GOTTES GNADEN LANDTGRAUE ZU HESSEN/ GRAUE ZU CATZENELNBOGEN/ DIETZ/ ZIGENHAYN VND NIDDA.

VNSERN gnedigen gruß zuuor/ Vester lieber besonder/ wir haben ewer schreiben de dato Segenberg/ den 22 verschienes Monats Septemb. neben dem vns zugeschickten Buch empfangen/ Thun vns deßwegen gegen euch gnediglich bedancken/ vnd wollen dasselbige zu seiner zeit mit lust verlesen. Darneben wollen wir euch auch nicht verhalten/ das vff angeben Pauli Wittichij/ wir vnsere Instrumenta Mathematica dermassen verbessert/ das/ da wir zuuor kaum 2 Min. scharff/ wir jetzo ½ ja ¼ einer min. obseruiren können/ Haben vns derhalben vff die Art Quadrantem Horizontalem, deßgleichen ein Sextantem, ad obseruandas distantias Stellarum inter se, lassen zurichten/ jedes von gutem Messing vnd bicubital. Halten auch drey Gesellen Astronomiæ et Obseruationum peritos ad iustificanda loca Stellarum Fixarum, Wiewol vnsere vorige Obseruationes, die wir selbst in otio vor angehung vnser Regierung nostris oculis genommen/ vnd dauon jhr als wir nicht anders wissen/ Copey gehabt/ nit vber 4 oder minut. vffs meiste ab hisce discrepiren werden/ hoffen auch bald damit zu endt zukommen/ wann wir nur klar Wetter circa nouilunium hetten/ welches vns diß gantze Jahr vber gemangelt. Nuhn has vns vnser Mathematicus CHRISTOPHORVS ROTHMANNVS zugeschrieben/ dz er einen kleinen Cometen vff den 8 huius, Abends vmb 9 vhr in 23 grad. 15 minut. piscium, cum Latitudine merid. 14 grad. 0 min. Vnd vff den 9 eiusdem in 25 grad. 50 min. piscium cum Latitud. merid. 13 grad. et 6 min. obseruiret, Denselbigen haben wir gestern den 19 zu Abend allhier doch mit keinen Instrumenten, sondern allein per lineas rectas vff vnserm Globo obseruiret, vnd jhn im 21 gr. Arietis, cum Declinatione latitud. 4 gr. merid. gefunden. Er ist klein/ vnd vmb vnd vmb hero voller Haer/ das |wir achten/ er sey ex genere Cometarum, so man vnsers versehens Circæos nennet/ vnd tempore maximarum coniunctionum zuerscheinen pflegen/ Was er nun bedeuten wird/ sonderlich dieweil er gar Saturninus, vnd Saturno coniunctus, gibt die zeit/ vnd möchten wol wissen/ ob er auch bey euch gesehen werde/ Mögen auch wol leiden/ das jhr TYCHONEM BRAHEN mit vormeldung vnsers gnedigen grusses/ Apparitionem et Obseruationem huius Cometæ, zuwissen thut/ mit begeren/ das er vns zuwissen thue/ wie er jhn Obseruiret habe/ Denn weil er |so klein/ halten wirs dafür/ er werde von weinigen obseruirt werden/ Das wollen wir vns vorsehen/ vnd seind euch mit Gnaden geneigt/