|DEM VESTEN VNSERM LIEBEN BESONDERN TYCHONI BRAHE, HERRN ZU KNUDSTRUP.
WILHELM VON GOTTES GNADEN LANDTGRAUE ZU HESSEN/ GRAUE ZU CATZENELNBOGEN/ DIETZ/ ZIEGENHAIN VND NIDDA/ ETC.

UNSERN günstigen Gruß zuuor/ Vester Lieber Besonder/ Wir machen vns keinen zweiffel/ jhr werdet vnser Antwortlich schreiben/ so wir den 14 verschienes Monats Aprilis, aus vnserer Vestung allhier an Euch gethan/ numehr beneben den vberschickten Obseruationibus vor lengst empfangen/ vnd vnsere meinung darab vernohmen haben. Dieweil vns aber biß noch vnserm gnedigen begeren nach/ darauff kein antwort zukommen/ Vnd vns dann diese gelegene Bottschafft zu euch vorgestossen/ So haben wir nicht vmbgehen können/ Euch hiermit voriges vnsers schreibens gnediglich zu erinnern/ Vnd ist demnach an Euch vnser gnediges begeren/ weil Vnsere vnd Ewere Obseruationes, so viel den negst erschienen , auch Stellam nouam ad Cassiopeiam antrifft/ gar nahe zusammen treffen/ Ihr wollet vns nicht allein Ewer Iudicium vber vnsere Obseruationes Stellarum fixarum hinwider zuschicken/ Sondern auch Ewere Obseruationes, was jhr so woll dabeuor/ als auch darsieder von Stellis fixis obseruit, communiciren, darmit wir sie gegen den vnsern zu conferiren, Sonderlich aber wollet vns Altitudinem vestri Poli/ wie jhr die bey Euch habt/ zuschicken/ Vnd |werdet jhr aus beygefügten vnsers Mathematici schreiben/ vnsere meinung weiter vernehmen. Wolten wir Euch also gnediglich nicht verhalten/ vnnd seind Euch mit gnedigen guten Willen wollgeneigt/