|DEM VESTEN/ VNSERM LIEBEN BESONDERN/ TYCHONI BRAHE, HERRN ZU KNUDSTRUP.
WILHELM VON GOTTES GNADEN/ LANDTGRAUE ZU HESSEN/ GRAUE ZU CATZENELNBOGEN/ ETC.

VNSERN gnedigen Gruß zuvor/ Vester lieber Besonder/ Wir mögen euch gnediglich nicht verhalten/ daß wir in vnserm Thiergarten ein Elendsthier haben/ daß sich dan diesen Winter vnd Sommer vber wol gehalten/ vnd fein zugenommen hat/ jm auch sonst nichts mangelt/ alß daß es keinen Gehülffen hat. Weyl wir dan auß ewerm |jüngsten Schreiben sub dato den 2. Aprilis verstanden/ daß jr auch ein Elendthier hettet/ vnd vns dasselbige gerne zustehen lassen woltet/ So nemen wir dasselbige von euch zu gnedigen danck an/ vnd haben demnach nicht vnderlassen wollen/ gegenwertigen Botten zu euch abzufertigen/ vnd jm zu befehlen/ daß er bemelt Elendt bey euch abholen/ vnd vns zufüren soli. Woferne jr vns nu dasselbige/ ewerm Zuschreiben nach/ folgen lassen wollet/ wie wir vns gleichwol zu euch versehen thun/ so geschicht vns daran zu angenemen gefallen/ vnd wollen wir es hiernechst mit einem hübschen Zapffenburger gegen euch erwidern/ vnd sonst in Gnaden eingedenck seyn.

Wir zweiffeln auch nicht/ jr werdet in dem Deutschen Exemplari Gesneri de Animalibus Quadrupedibus gelesen haben/ was er fol. 85. von einem Thier/ so Rix, oder wie etliche wollen/ Orix genandt wird/ schreiben thut/ Möchten gerne wissen/ ob jr davon etwas in Erfarung bracht/ oder auch mit Leuten geredt/ die es gesehen/ oder berichten können/ was es vor ein gelegenheit darumb habe/ vbi inveniatur, et si tansæ proceritatis,quantæ a Gesnero pingitur, siet.

Vnser Mathematicus CHRISTOPHORVS ROTHMANNVS ist bey vns noch nicht widerumb ankommen/ vnd ob wir jn wol zu vns anhero erfordert/ so hat er sich doch seiner Schwacheit halben (darumb wir gleichwol keine eigentliche gelegenheit wissen) entschüldigen lassen.

Die begerte Papiermacher haben wir bißhero vber angewendten fleiß nicht bekommen können/ Wir haben aber vnsern Dienern/ so wir jetzt angehende Franckfurder Meß abgefertigt/ befolen/ daß sie sich daselbst fleissig vmbhören sollen/ ob sie dieselbigen zuwegen bringen mögen/ Was nu dieselbigen außrichten/ davon solt jr hiernechst berichtet werden.

Was wir dißmal von Zeitungen bey handen gehabt/ davon thun wir euch hierneben Abschrifft zufertigen/ vnd werdet jr darauß vernemen/ |wie es in Franckreich vnd andern orten jetziger zeit stehet/ vnd daß es miserrimus Status totius Europæ ist. Was jhr dan de Statu Daniæ vnd sonst newes habt/ begeren wir gnediglich/ vns solchs hinwider zu communiciren.