||ARCIS VRANIBVRGI QVO AD TOTAM CAPACITATEM DESIGNATIO.
||DELINEATIONIS TOTIUS CAPACITATIS EXPLICATIO.
Domus præcipua in ipso meditullio totius capacitatis extructa, et per quatuor latera æquale quadratum efficientia in 4. mundi plagas exactissime uergens, ita ut duæ turriculæ Meridiem et Septentrionem, ambæ uero ualuæ Ortum Occasum exquisite respiciant. E. Porta Orientalis opere Rustico et Tuscano composita. D. Porta Occidentalis eodem opere elaborata. Habent autem hæ binæ portæ superius duos canes maiores Anglicanos excubatores in conueniente domuncula, ut undique aduentantes latratu indicent, et simul superius cameras pro peregrinis. B. Officina Typographica, maioris domus Idæam parua forma quodammodo referens. C. Domuncula pro ministris, etiam maiorem domum, quo ad frontispicia et quædam alia repræsentans. F. Interior ualli facies. G. Exterior eius forma cum sua dispositione. N. Quatuor uiæ uersus ambas portas et utramque domunculam ducentes, quæ in 4. mundi plagas adamussim excurrunt. O. Quatuor ianuæ hortorum. M. Pergulæ quatuor in illis semicircularibus uallis amœnitatis gratia dispositæ. L. Horti herbarum et florum. H. Horti arborum uarij generis numero circiter trecentarum. Atque hæc est totius capacitatis descriptio. Habet autem ualli ambitus figuram quadratam in medio Semicirculari intertextam, ut in antecedente designatione patet. Singula uero quadrati latera continent pedes 300. Crassities ualli fundamentalis est 20. ped. Altitudo eius 22. ped. Diameter uero Semicircularis ualli interior est ped. circiter 90. Domus ipsa in medio sita, quæ etiam exacte quadrata est, habet in singulis lateribus circiter pedes 60. Altitudo muri 45. ped. Turres uero rotundæ a Meridie et Septentrione appositæ habent 22. pedes in diametro, quibus ambitus exterius adhærentes addunt pedes 10. Porticus ab Oriente et Occidente inferius quadrati habent 15. pedes in quolibet latere. Tota altitudo domus a terræ superficie usque ad Pegasum supremum est pedum 75. Domus etiam ipsa, quaquauersum patet, hypogæa habet ædificia, quorum profunditas est pedum duodecim. Imo et quædam alia sunt infra hæc. Ista uero subterranea cum sint non hîc repræsentantur, utut multis constent discriminationibus, et in uarios usus ordinata sint, quæ etiam magnis sumptibus, et pene non minoribus, quam superior domus pars quæ supra terræ planitiem extat, ac sub dio patet, confecta sunt.
