|ILLVSTRISSIMO PRINCIPI AC DOMINO, DOMINO MAVRITIO, LANDTGRAVIO HASSIÆ, COMITI IN CATZENELLEBOGEN, DIETZ, ZIGENHAIN ET NIDDA: PRINCIPI AC DOMINO CLEMENTISSIMO. S. D.

ILLVSTRISSIME et Generosissime Princeps: Plurimâ equidem T. C. me læticiâ affecit, dum non modo Literis suis clementer nostris respondere: Sed et Carmen commendatitium in Opera, quæ molimur, Astronomica, scite et eleganter concinnare, proprijsque digitis circa frontispicia chartæ transmissæ consignare, non dedignata sit. Pro qua etiam clementi erga me, meaque studia affectione gratias T. C. demisse ago, quas possum, maximas. Exhibebunt utique versus illi clarissimum T. C. erga tam sublimes Artes et me etiam favoris et benevolentiæ Τεκμήριον, Posteritati in auspicijs meorum Operum Astronomicorum iugi memoria consecrandum: mihi vero devotæ erga T. C. observantiæ μνημοσὺνον nulla oblivione interiturum suppeditabit. Cur autem non antea T. C. hoc nomine rescripserim, et quare Tabellarium hunc tam diu hîc detinuerim, caussas in Literis ad Illustrissimum T. C. Dominum Parentem datis, luculenter exposui. Quin et antea idem per Præstantis. et Eruditis. Virum Doctorem NICOLAVM THEOPHILVM, nunc in Academia Hafniensi Iuris Professorem, olim T. C. Parenti in Cancelliæ negotijs operam nauantem, indicare animus erat: Quo etiam nomine ad ipsum perscripseram. Verum intellexi postea, ob aduersam valetudinem iter eius, quod in HASSIAM adornârat, præpeditum fuisse. Præter voluntatem igitur meam accidit, quod adeo tarde tam Illustrissimi Parentis, quam T. C. Literis nunc respondeatur. Quam |moram ut C. T. clementi animo in potiorem partem accipiat, atque excusatam habere velit, etiam atque etiam submisse rogo. Nec ulterius T. C. impolitis hisce meis literulis, alijs forte intentam, gravabo. Verum C. T. Deo Opt. Maximo, quam plurimum commendatam cupio. Is C. T. vitam et actiones in vestigia Paternarum virtutum dirigat, et ad Reipub. emolumentum feliciter disponat.