DUM mea FALCHONEM petis altera Littera GOYVM,
Altera vis, LANGVS non vt ERICVS amet:
Nullanè Doctiloqui venies sub tecta IACOBI
VLFELDVMque Elegis Littera nulla petas?
ILLE tibi quamuis, superatis obuius vndis,
Qui sicco excipiet littore, primus adest.
Jmò adeundus erit, properes mea Musa, salutes;
Proximus estque viæ, nec remoratur iter.
Is sincero etiam, nobis nostrisque Camœnis,
Corde fauet, quare is prætereundus erit?
Nec minus ac FALCHO Studiis incumbit Honestis,
Fortè nec ille minus, quam vel Ericus amat.
Siue Studet, vel Amat, vel agat si forsan vtrumque,
Tecum in vtroque, ipsum quod recreabit, habes.
Tu modò, FALCHONI quod misimus, et quod ERICO
Huic lege, dic, pariter scripta IACOBE tibi:
Nomina si mutes, vestris res omnibus vna
Conueniens Studiis, quæque iuuabit, inest.
At si fortè roget, venias cur pressa labore,
Curque sies nulla Littera scripta manu,
Hæc referes: totum quæ nunc expulsa per Orbem
VRANIA, Arctoum gaudet adire Solum,
Jamque sibi exigua posuit Tentoria Huæna,
Qualia vix magno fixit in Orbe prius,
Et, licet ingrato, statuit concredere, Mundo,
Quæ peragat studiis, participanda, suis.
|Hos igitur Typos fieri curauit, vt omnis
Illius, his, toto clareat Orbe, Labor.
Rebus at effectis, quia non satis ampla Papyrus
Suppetit, et pretio cedere cogit Hyems;
Interea Typos requiescere noluit, ast hos
Ire iubet, quà quis Doctus Amicus adest.
Inter præcipuos cum tu numereris Amicos,
Artibus et Doctis, Eloquioque vales,
|Nec te, perque Elegos, per Amicaque verba, licebat
Pressa etiam Typis præteriisse, nouis:
Pressius vt domini, qui me misitque fauetque,
Constaret, nouus, at non abolendus Amor
Sit licet ille nouus, tamen inueterascet in æuum,
Corde magis pressus, quam mea pressa Nota est;
Typus Amicitiæ fictis si pingitur Vmbris,
Vero etiam Typis vti in Amore licet.
Hæc vbi dicta sient, velut est Vir dignus Honore,
Obsequium præsta; mox Valedic, et abi.
