VNSERN gnädigen Gruß zuvor/ Vester lieber Besonder/ daß wir euch nu in so langer zeit nicht geschrieben/ ist die Vrsach/ daß vnser Mathematicus CHRISTOPHORVS ROTHMANNVS, ein zeitlang hero fast vnpaßlich gewesen/ zu dem auch numehr wir selbst/ tam mole ætatis, quam laborum atque curarum, dermassen gedruckt werden/ daß wir vns mit den oblectamentis Mathematicis nicht mehr/ wiewol zuvor beschehen/ oblectiren können. Nicht desto weniger aber/ dato otio, vnderlassen wir vnser Studium Mathematicum nicht so gar bleiben/ sondern hincken noch hernacher/ wie ein alt Weib am Stecken/ Befinden aber doch/ daß es leider mit vns so weit kommen ist/ daß was wir hiebevor magna alacritate selbst erfunden/ jetzo nicht mehr wol verstehen. O pietas, o prisca fides; quis talia fando, Temperet a lachrymis? Was aber vorgedachten vnsern Mathematicum betrifft/ ist derselbige der meynung/ wenn er nur ein wenig möcht wandern/ vnd die Lufft verendern/ daß es alßdenn mit jhm besser werden solle/ Welchs wir jhm aber hart widerrathen/ So hat er aber doch einen eignen Kopff/ den kaufft er alle Jar einen eignen Hut/ damit müssen wir jhn lassen geweren/ Aber leidt were vns/ wenn jhm einiger Schade widerfahren solte/ denn er ist ingeniosus, vnd ein feiner gelehrter Gesell. Begeren derhalben gnädiglich/ jhr wollet euch jhm von vnsert wegen lassen befohlen seyn/ vnd jhm ewere Instrumenta Mathematica sehen lassen/ Auch widerumb von jhm vernemen/ was vns vnser Vhrmacher für Instrumenta gemacht/ vnd noch zu machen vnderhanden hat. Deßgleichen vns auch hinwider zuentbieten/ wie es allenthalben/ so wol vmb euch alß auch ewern gnädigsten Herrn den jungen König/ vnd die gantze Regierung deß Königreichs Dennemarck/ jetzo stehet. Das seyndt wir hinwider gegen euch in Gnaden/ damit wir euch sonders wol gewogen/ zu erkennen geneigt.