HIS sane litteris, quas nunc ad te mitto, perillustris ac eruditissime vir, brevitatem sum secutus: et quamvis in Epistola illa, quam cum eo opere, quo te merito, grati animi meæque erga te observantiæ declarandæ causa, nuncupavi, communitam dedi, quamque brevi ad te sum transmissurus, pluribus egerim: tamen ne negligentiæ nomine me accusares, tibi indicandum duxi, me hactenus a Patavina poli investigatione ac Martis affixorumque syderum meridiana altitudine investiganda, quam tantopere cum GELLIO tuo, vel potius, nostro, observare cupiebas, supersedisse: cum, quod eiusmodi observationibus nec opportunum loci situm, nec commodam ad ea exploranda occasionem, ut ingenue GELLIUS ipse testabitur, invenire potui, tum etiam quod diversorum negotiorum cumulo varijsque molestijs, quas mors carissimæ Matris gravissimas auxit, plurimum toto illo æstivo tempore, quo Venetijs et Patavij hæreo, sum circumventus. Sextantem interim tuæ inventionis, et tui gratia, et meæ exercitationis causa, fabrefieri feci, eumque cœlo exactissime ad singula minuta, dum unâ cum dicto GELLIO easdem nonnullarum fixarum distantias, quales ex tuis observationibus in Fixarum Catalogo tu ipse antea notasti, deprehendi, respondere comperi. Eundem Bononiam mecum exportabo, ibique Quadrantem maiorem ad altitudines observandas elaborare faciam; et plures tui causa observationes perficere conabor. Radium etiam Astrologicum iustæ magnitudinis construi faciam; in cuius oblongi extremitate cylindrus sit apponendus, ubi scilicet in aliorum radijs oculus applicatur: in transversarij vero extremitatibus affigendæ erunt duæ pinnulæ cum suis foraminibus, sicut in tuis Instrumentis facere soles, quæ tamen libere circumvolvantur, ut radij per eius rimulas ac iuxta cylindri extremitates transmissi paralleli fiant. Hoc transversarium volo, ut lateraliter tantum moveatur, dividendo ipsum in particulas illas, in quas hasta seu fustis divisa est, pro ratione sinusA totius particularum 10000: hoc enim pacto portio transversarij ab hasta secta erit tangens anguli, qui fit ad cylindrum, dum unus observator per pinnulam fixam in hastæ extremitate, alius vero per pinnulam in extremitate transversarij sitam, stellas inspiciunt.

Privilegium tuorum operum, quod anxie petij, ab Illustrissimis Venetis obtineri nequit: id enim responsi a nonnullis nobilibus tuli: Senatum Venetum non solere illorum operum, quæ extra Urbem edantur, concedere privilegia; et si aliqua sub Libris alibi excusis sua legantur, ea honoris tantum, non valoris gratia esse concessa, cum Bibliothecæ Venetæ ex ipsius Senatus gratia id iuris habeant, ut quoscumque libros alibi impressos, non obstantibus quibusvis, nedum ipsius Senatus, privilegijs, Venetijs denuo typis mandare possint. Illud tamen honoris privilegium, ubi opus illud iamA typis excusumA antea vidissent, ab Illustrissimis Venetis haberi posset; solent enim, quicquid edatur, legere et perscrutari, num scilicet contra Sacrosanctam Ecclesiam, bonos mores, aut Principes Christianos quicquam scriptum sit, priusquam sua illa privilegia impertiantur. Illustrissimi autem Ducis Mantuæ et Ferrariæ, per familiares et amicos, privilegium facile, uti spero, obtinebo. Expecto adhuc magno cum desiderio Librum tuum primum, quem iam sub prœlo esse ex GELLIO intellexi; interim obnixe te rogo, ut si quid in tui gratiam possum, libere mihi committere ne graveris. Vale, perillustris Vir, et Astronomiæ Princeps, quam restaurare, ut hucusque felicissime a te factum, pro communi commodo nunquam intermitte.