VONN Gottes gnaden Vlrich, hertzogk zue Meckelburgk. Vnnsern gunstigen gruß vnd geneigten willen zuuor. Erenuester, lieber besonder, Wir haben ewer sc[h]reiben empfangen, vnnd darauß vngerne vermercket, das sich eine sulche Veranderung, alß jhr Vnnß darin zuerkennen geben, mit euch zugetragen, vnd Wir wol erachten können, das euch allerhande vngelegenheidt vnd beschwerung darauß entstehet, so tragen Wir zwar mit euch eine gnediges mitleiden, vnnd als Wir dan nitt allein selbst zuerinnern wißen, was Wir vor etlichen Jahren vor schöne instrumenta astronomica auff der jnsula Huen bey euch gesehen, sondern auch sonsten zum theil auß ewern in druck außgegeuen vnd Vns mitgetheilten operibus, zum theil aber auß anderer leutte bericht erfahren, wo hin jhr ferner ewer arbeitt gerichtet gehabt, so were dennoch wol zu wunschen, das jhr in der selben continuation an voriger ewer stelle hettet bleiben lasßen, vnd des wolangefangen werck zu glucklich endtschafft außfhuren mugen, wie Wir auch den euch derowegen bey verwantes kurtzes schreiben an die kön: w: zu Dennemarcken, Vnsern freundtlichen hertzvielgeliebten herrn son, mittheilen wollen, diesen einhalt ihr auß der abschriefst zuersehen, vnd Wir nun zu eweren bedencken stehen, ob eß euch dienstlich sein mochte, das jhr eß vbergeben lasßet oder nicht. Sonsten können Wir gar wolleiden, das ihr euch ewer gelegenheidt nach alda in Vnser stadt Rostogk auffhaltet biß zu andern ewer besßer beqvemlichheidt, dan Wir kein vrsachen wisßen, warumb Wir solches zu wiedern sein lasßen, welcher gestalt aber die von euch nun lange zeit hero getrieben astronomische sachen ferner dieser orter oder sonsten in Deutschlandt dergestaldt, wie es von euch nun edtlicher iher hero damit gehalten werden, möchten vergesetzt vnd nach notturft befordert werden konnen, darauf werdet jhr ohne zweiffel selbst wolgedacht haben. Sonsten musen woll bekennen, das eine grosßes dazu gehordt, vnnd in eines jeden vermugen nicht ist solche sachen außzufuhren, vnd das derowegen dieselben groser potentaten patrocinij vnnd befurderung wol bedurffen. Dieweil euch aber die gelegenheidt in Teudtschlandt beser bekendt, also das sie euch anzuteutten von notten, sintemal ihr selbst viele jahr darin zugebracht, so wertet ihr auch selbst zum besten wiesen, wes euch zu thun sein wil. Haben euch zue gnedigsten antwort nicht verhalten wollen, vnd Wir sein mit gnaden wolgewogen.