AUGUSTISSIME Imperator RUDOLPHE Secunde. Cum de tuæ Imperatoriæ Maiestatis erga liberalia studia, præsertim in his principaliora, Mathematica et Astronomica, clementi favore, diu multumque inaudiverim, ipsaque tua Cæsarea Maiestas non tantum potentissimorum et laudatissimorum maiorum suorum ALPHONSI Regis Arragonum etc. MATTHIÆ HUNNIADIS, HENRICI illius secundi ob indefessam rerum cœlestium contemplationem Astronomi dicti, CAROLI quinti, FERDINANDI ac Augustissimi Parentis MAXIMILIANI secundi aliorumque, studijs his impense addictorum, quos numerare longum foret, celebratissimo exemplo, sed et sua ipsiusmet vere Heroica et Cæsarea inclinatione, quantum Regnorum ac Reip. gubernatio ferunt, ijsdem his laudabiliter vacet exercitijs: omnino mihi polliceor, Cæsaream tuam Maiestatem clementi animo accepturam, me viarum intercapedine alijsque difficultatibus, quo minus Cæsaream tuam Maiestatem ipse cito adeo, ac præoptarim alias, accedere liceat, præpeditum, hasce literas arduum licet negotium concernentes summisse exhibere non vereri ipsi. Cuius meæ fidentiæ caussam hanc primam habeo et præcipuam Imperatoriæ tuæ Maiestatis clementissimum erga me eaque, quæ multis abhinc annis tracto studia, favorem, iampridem mihi vel ex solo eo singulari diplomate perspectum, quod Cæsarea tua Maiestas tanquam in epistola ad me directo sermone clementer mihi impertiri, non sine harum artium præclaro elogio, dignata est. Cæsarea itaque tua Maiestas præsentibus hisce clementer scire dignetur, me, evidentibus ijsque haud levibus de caussis mutato Patrio solo, in Germaniam tuæ Cæsareæ Maiestati subditam cum Astronomica mea supellectile, adeoque tota familia, nuper concessisse, ut est rerum humanarum omnium quædam subinde vicissitudo. Ubi, favente cœlestium Opifice, Astronomicos meos labores per 21 Annos in patria mea dulcissima Dania exantlatos continuare ac ad propositum scopum dirigere et absolvere decrevi, impetrata primum hîc alicubi et constituta rebus cœlestibus sat commoda, constanti et inviolabili sede, unde fundamentalis earundem tractatio æviternum ad posteros etiam in Imperij ipsius decus (uti confido) non contemnendum transmitti possit. Quocirca ad tuam Imperatoriam Maiestatem omnium primo mihi concedendum, eiusque clementissimam voluntatem quam humillime explorandam censui, an non illustre hoc Astronomicum negotium solide et solenniter institutum in aliqua suarum ditionum porro continuare atque ad optatum finem, Dei beneficio, perducere daretur. Sunt mihi ad hoc Opus in promptu Instrumenta varia, eaque maxima et affabre elaborata, qualia et quanta vix uspiam invenire datur. Sunt plurimorum annorum exactissimæ Observationes veterum inventis non cedentes. Sunt multa alia huc conducentia, et non pauca, imo præcipua iam confecta. Ut vero Cæsarea tua Maiestas specimen aliquod eorum habeat, mitto cum filio meo Organorum, quæ hactenus in usu habui, quotquot tam cito exscindi curare licuit, delineationem, apposita earundem succincta explicatione. Offero quoque humiliter Canonicam Affixarum Stellarum expositionem, quotquot in nostro climate utcunque visuntur, numero millenarum, quas omnes intra Annos 20 præteritos summa et indefessa diligentia meis Organis cœlitus quam scrupulosissime demensus sum, cum sine harum, potissimum Zodiaco vicinarum, exacta verificatione Planetarum viæ et motiones ad amussim non percipiantur. Qua etiam in parte (quoad errantia videlicet sidera) quid hactenus præstiterimus, quidque in posterum superaddendum restet, prior ille, de quo dixi, liber suo loco pandit. Plura meorum de Astronomia Operum tua Cæsarea Maiestas, cui me meaque studia omnia humiliter offero et commendata cupio, brevi, aspirante Universitatis authore, obtinebit. Interea hasce primitias alijs gravioribus viam sternentes non aversetur. De cætero Cæsarea tua Maiestas per Dominum Procancellarium Imperij aut aliquem e suis Consiliarijs intimis, referente Domino Doctore THADDÆO HAGGECIO, clementer intelligat, qui a filio meo præsente singula uberius cognoscat. Utque Cæsarea tua Maiestas, hoc intermediante, sibi humillime meo nomine proposita clementer excipiat, et responsum, quandocunque eidem commodum fuerit, impertiri dignetur, qua possum submissione precor.

Deus Cœlestium et Terrestrium author tuam Cæsaream Maiestatem felici Imperij et Regnorum gubernatione quam diutissime florentem et incolumem tueatur.