SERENISSIME et potentissime rex, domine clementissime. Regiæ tuæ Majestati in hoc novo conjugio adeoque toto regimine optima quæque et faustissima ex animo precor et voveo ac gratias, quas possum, maximas pro beneficiis a laudatissimæ memoriæ parente Friderico mihi præstitis quamplurimis submisse ago, quodque inde ab eo anno, quo Regia Tua Majestas in lucem hanc prodiit, divina illa scientia astronomica in Dania, patria mea dulcissima, liberaliter sustentata sit. Et sane non minora de Regia Tua Majestate mihi indubie pollicebar et citra frustraneam spem expertus fuissem, ni quorundam insatiabili mei odio laborantium (uti non exiguis indiciis reor) malevolus in me animus obstitisset, quos tamen nullo pacto læsi unquam, imo cuidam, quem horum latentem et inveteratum machinatorem existimo non parum profui. Quamobrem statim a Regiæ Tuæ Ma:tis coronatione mutationum incidere occasiones, uti sunt rerum humanarum subinde quædam vicissitudines. Idque forte fataliter evenit, ipsis jam astris artis suæ excercitium alio dirigentibus et destinantibus, cum et tertius annorum climactericus, per se alterationibus obnoxius, a prima Uraniburgi isthic fundatione ageretur. Præterea Regiæ Tuæ Majestati humiliter et enixe gratias habeo, quod, siquidem ita necessitas postularet, ut me cum iis, quibus tantopere invigilo, exercitiis astronomicis in vicinam Germaniam conferrem, nec iter impedire, nec retinere, nec etiam, cum Rostochii per anni quadrantem in propinquo manerem, aut postea, dum in extremis Holsatiæ finibus moror, revocare voluerit, quo mea studia non retardarentur, et astronomiam universaliter, ut toti orbi noster undiquaque inserviret labor et acceptum sit condendi propositum. Quo sane nomine eo magis Regiæ Tuæ Majestati me obstrictum video. Nam licet hoc maximo meo factum fuisset incommodo, et majore fortassis aliorum, qui nostra undiquaque avide expetunt et nequaquam contemptui habent, ob amorem tamen in Patriam et honorem regi meo serenissimo præstandum nolens volens obtemperare atque particularia universalibus præponere coactus fuissem, cum minori meo et aliorum emolumento. Quapropter etiam, cum Rostochii ea de caussa tam diu non sine periculo ob luem epidemicam isthic grassantem neque sine magnis expensis ob familiæ copiam et annonæ caritatem subsisterem, ad Regiam Tuam Maiestatem submisse literas dedi et abitus mei caussas nonnihil, quantum licuit, attigi, meamque operam Regiæ Tuæ Majestati et patriæ submisso animo sinceraque intentione obtuli, in omnibus, quæ in ipsius et patriæ honorem per me unquam præstari possent, modo tolerabilibus conditionibus id fieret, et indemnitati meæ competenter consuleretur. Quæ literæ, quod non eo, quo a me scriptæ, candido nimirum et in patriam studioso affectu animoque in serenissimum regem meum submisse obsequioso, acceptæ sint aliorum, uti existimo, eas sinistre admodum interpretantium malevolentia admissum est, sive quod aliquo clanculario mei laborarent odio (cujus tamen me iis caussas dedisse non sum conscius) sive quod suo sic abundare sensu vellent. Quod equidem nec iis invideo, nec ægre fero. Regiam vero Ma:tem Tuam, horum neutiquam consciam, lubenter in his excusatam habeo.A Verum sit hoc quicquid velit, quod veritas, temporis filia, aliquando prodet meamque integritatem tuebitur, tamen de patria mea (uti par est) honorifice sentire, et Regiæ Majestatis Tuæ honori, quantum in me est, submisse studere ejusque virtutes deprædicare non desinam. Utque id aliqua nunc ex parte declarem atque Majestati Tuæ pro beneficiis clementer præstitis, qua possum, submissione me gratum ostendam, duos eidem libros, in ipsius regno primum natos, hic vero in Germaniæ vicinæ finibus nuper completos offero et exhibeo. Regiam etiam Tuam Majestatem, cum et aliis regibus et principibus viris eadem mittam, præterire minime decuit aut licuit. Submisse itaque et humiliter rogo, Regia Tua Majestas hoc regio et clementi animo acceptare non dedignetur. Plura et his majora de rebus astronomicis, annuente astrorum opifice, subjuncturus sum, quorum maiorem partem itidem in Regiæ Tuæ Majestatis regno, patria mea charissima, pluribus jam annis a me elaboratam, reliquam vero hic per otium hybernum ulterius confectam atque absolutam, in Regiæ tuæ Majestatis et regni honorem, favente eodem numine, propediem publicare decrevi et Regiæ Tuæ Majestati, modo id ei non ingratum intellexero, demisse offerre. Interim et semper, ut Regiæ Tuæ Majestati ego meaque omnia quam commendatissima sint, qua possum et decet submissione precor.

Deus opt: max: Regiam Tuam Ma:tem in regnorum et ditionum gubernandorum utilitatem et commodum cum ser:ma et optima conjuge quam diutissime florentem et incolumem conservet.