VANN Gottes gnadenn Katharina, geborne vndt vermehlte marggreffin, auch churfurstin zue Brandenburgk, jnn Preusen hertzogin. Wnsern gnedigenn grues zuuorn. Ernuester besonder lieber, Wir thuen euch auff eur begehrn hiermitt Vnserm diener vndt lieben getrewenn Johann Mullern zu dem ende vbersendenn, das ehr ein zeittlang mitt euch conuersiren, vnnd sich in mathematico studio aldar exerciren muegte. Begehrn demnach an euch hiermitt ganntz gnedigst, jhr wollett euch nichtt allein jnn dem kegenn jhnen willfehrigk erweisenn, sonndern auch in spagiricis medicamentorum præparationibus, vnnd was jhr sonnstenn auss erfahrung in pyronomicis habtt, jhnen guettwillig vnterrichtenn, vnndt euch inn diesem allenn dermassen erzeigen, wie vff eurre Vnns durch jhnen, Vnnsernn diener, gethene zuesage erbietenn, zu euch Vnser vngezweifeltes gnedigstes vertrawenn gerichtett. Das wollenn Wir jnn allenn gnadenn, darmitt Wir euch sonnds woll gewogenn, hinwieder mitt danck zu erkennen vnuorgessenn halltenn. Vnnd ob Wir jhn woll gherne nebenn eurem sohne ettwass ehe wieder abgeferttiget haben wollten, so seindt doch Vnnserm freundtlichenn hertzlieben herrn gemahl bißhero andere wichtiche sachenn vorgefallenn, das man darzue fueglich nichtt ehe kommenn konnenn. Werdet der wegenn euren sohn, der es zwartt wie auch gedachter Johann Muller an vleissigsten vnndterthenigstenn sollicitiren nicht manglen lassen, im besten enttschuldigett haltenn. Wir seindt der vnzweifeligen zuversichtt, es werden bey der könn: wd:, Vnnserm freunthlichen hertzvielgeliebten herrn vettern vnnd sohne, die euch mittgetheilte intercession schrifftenn ohne frucht nicht abgehen, sonndernn dardurch eure sachenn wiederumb zu selbst wunschendenn gueten standt gelangenn, wie Wir euch denn gnediglich wunschenn, vnnd mochtens euch gnediger meinunge nicht verhaltenn, deme Wir mitt gnadenn gneigtt.