Ernst etc.

WAS Wir jhrer kay: maytt: wegen des weitberuhmbten Tychonis Brahe vnterthenig zuschreiben, das hastu ab dem einschluss zu[v]ernehmen. Jst darauf Vnser gnedigst gesinnen an dich, wan du vernehmen wurdest, das solche schreiben jhrer kay: maytt: vberantworttet werdenn, das du pro uiribus daran vnd darob seyst, damit dieser ehrlicher man balt bescheidt auf seine æquissimas prætensiones haben möge, dann diese zeugnuss Wir ihme geben können, das ehr unicus restaurator hujus laudatissimæ scientiæ, vnd das Vnser patria Germanica jhme selbst nit allein congratuliren, sondern apertis ulnis et brachijs zu empfahen geflissen sein soll. Vndt weil sein personn vnd studia dermassen per uniuersum orbem beruhmbt, auch vnter andern dem gewesenen vicecansellario Kurzio gar woll bekandt gewest, so achten Wir vor vnnöttig, dir sein personn weiter zu recommendiren. Allein haben Wir dir auch zu erkennen geben wollen, das Wir jhme Tychoni Brahen, tum propter conformia studia tum propter eius insignia erga artem mathematicam merita, mit sondern gnaden zugethan sein, alsso das Wir Vnß zu dir gnedigst versehen, du werdest jhnen auch von vnserntwegen bey j: kay: maytt: gehorsamblich zurecommendiren nit vnterlassenn, vnndt Wir bleiben dir mit gnaden gewogen.