ILLUSTRIS ET GENEROSE VIR, DOMINE ET AMICE HONORANDISSIME.

QUOD Ill^ris Dn° tua Nobilem et Eruditissimum Adolescentem FRANCISCUM TENGNAGLIUM et filium meum TYCHONEM non solum adeo comiter et benevole exceperit (neque enim Ill^ris Dn^is tuæ eximiam humanitatem sibi exhibitam huc reversi satis deprædicare poterant) sed et cultissimis suis literis sincera erga me benevolentiâ refertissimis mihi rescribere non degravata sit, pro eo Illⁱ Dnⁱ tuæ gratias ago quas possum maximas: si quâ in re mea opella illi unquam usui esse possit, quam lubentissime pro virili relaturus.

Quæ M. KEPLERUS (cuius ingenium et consuetudo mihi perplacent, ut dignum eum censeam, qui ametur et ad optima quæque promoveatur) oretenus ad me retulit, percepi. Et quantum ad primum attinet, de studioso illo hîc alendo et informando, actutum respondi, me non saltem in hoc, sed longe maioribus Ill^ri Dnⁱ tuæ pro meo modulo gratificaturum: alterum satis prævidi confici non posse, prius quam expressum ab Aulâ Cæsareâ decretum in Cameram mitteretur; quod iam conscriptum esse intellexi. At ubi hæreat, me latetA. Quia vero a dicto TENGNAGLIO cognovi, quod, cum ante quatriduum Brandeisium concessisset, ut cum Domino Capitaneo quædam meo nomine loqueretur, eumque illic non repertum Pragæ quæsivisset, Ill^rem quoque Dn^nem tuam pauculis alloquutus sit, quodque consilium illud de KEPLERO atque illo alio, cum illud Illⁱ Dnⁱ tuæ paucis exponeret, eidem placuerit, deque eo ipsamet mecum ulterius loqui velit, dabo operam, ut quamprimum nonnulla, quæ pro Cæsareâ Ma^te, Domino nostro Clementissimo, elaboro, confecta fuerint (nam prius hinc abire vix ausim) assumpto mecum M. KEPLERO Pragam excurram, quo apud Ill^rem Dn^nem tuam hac de re, prout ea suaserit, deliberemus et certi aliquid statuamus. Neque enim ipse KEPLERUS Ill^ri Dn^one tuâ inconsultâ quicquam concludere voluit. Quod et ego probo, siquidem absque eiusdem consensu et suasu nihil nobis faciendum censeam. Intellexi quidem quodammodo, nonnullas difficultates sese insinuare, quibus tamen (uti spero) ex Ill^ris Dn^is tuæ prudenti provisu facile occurremusA, ijsque medelam adhibebimus. Quare omnia circa hoc negotium, donec cum Ill^ri D^ne tuâ præsentes de eo egerimus, differenda arbitramur.

Quæ de Mechanico illo Artifice ab Ill^ri D^ne tuâ accersendo antedictus TENGNAGLIUS pariter mihi exposuit, cognitu grata erant. Si eum Ill^ris Dn° tua, ubi accesserit, ad me (uti constituit) amandârit, efficiam, ut in Instrumentis ad observationes ratas idoneo modo fabricandis componendisque instructior ad ipsam redeat. Excogitavi iam nuper quoddam ad varios usus minimo negocio conducens, quodque simul per longinqua itinera commodum sit portatu: idque eam præsertim ob causam, quam TENGNAGLIUS noster Ill^ri Dnⁱ tuæ secreto aperiet. Præbebit et hoc circuli Sextantem, et non saltem Altitudines et Siderum distantias etiam ultra sextam Cœli partem usque in Quadrantem, imo etiam eo ampliores, quoad intercapedines, solerter et satis subtiliter rimabitur, atque insuper longitudines ac latitudines Planetarum per totum Zodiacum minimo labore et absque tædiosâ supputatione; tum quoque ascensiones rectas et declinationes Stellarum non longe ab Æquatore utrinque dissitarum promet. Quin et, quod plus est, earundem a Meridiano Æquatorias distantias pro temporis momento inter observandum perquirendo et subinde examinando suppeditabit: ut de alijs quibusdam minoribus utilitatibus nihil addam. Ubi vero artifex ille advenerit, illi structuram eius proponam, et si confectioni absolvendæ idoneus (uti existimo) fuerit, cum Ill^ri tuâ Dn^ne id, quicquid est, lubens communicabo, atque succinctum et multiplicem eius usum eidem reserabo. Plura nunc non addo, ne Ill^rem Dn^em tuam nimium remorer. Si quæ hîc desiderantur, a TENGNAGLIO uberius, si vacârit, percipiet.