CLARISSIME et præstantissime Vir, Domine et Amice honorande, quod per Clarissimum Virum Dn. D. IOH. GEORG. GÖDELMANNUM, communem nostrum amicum, sexcentos illos thaleros a quæstore Iuniorum Principum loco interesse mihi debitos transmiseris, ijs qui Belgici erant in imperiales maiore ex parte commutatis, recte a te factum est, eoque nomine plurimas tibi habeo gratias. Quod autem idem quæstor reliquos 600, qui mihi nunc debentur, tunc numerare noluerit, non equidem miror, utut non iniquum fuisset, si id officioli mihi præstitisset, sed quod totam summam satis mature resignatam et consensu et iussu Illustriss. Ducis UDALRICI mihi ad hoc Pascha restituendam solvere tergiversetur, nescio quas alias prætendens expensas et calvas excusationes, id mihi magis displicet, nec ferendum duco. Scripsi itaque ad dictum Illustriss. Ducem UDALRICUM, sponsorem primarium, ut ad constitutum tempus integram summam decem millium Ioachimicorum mihi restitui sua authoritate curet, quod et non invite effecturum optimum illum et integerrimum Principem, mihi clementissime faventem, nullatenus diffido. Obtigit mihi occasio, qua in hisce oris plus commodi ex illa pecunia nancisci queam quam isthic, alias non tam cito eam repetijssem.

Quin et præterea ad præfatum Illustriss. Ducem dedi literas, qua ipsius Celsitudinem ad nuptias filiæ cuidam ex meis ELISABETHÆ nomine submisse invitavi, cum quodam Nobili et erudito Iuvene FRANCISCO TENGNAGLIO e Westphalia oriundo atque in hac aula versasante, ad instans Pentecostes, favente Cœlesti Numine, celebrandas. Cum enim non saltem Cæsaream Maiestatem, Dn. nostrum clementiss. et præcipuos eius Consiliarios et aliquot Germaniæ Principes, tam Ecclesiastici quam politici status, quos scio mihi clementer favere, humilime per literas invitare animus sit (quod et nonnullorum Legati, qui hîc sunt, sponte a me petierunt, atque suis Dominis gratum futurum innuerunt) Illustrissimum Ducem Megapolitanum, Dn. meum clementiss. et quam optime de me meritum, præterire nefas duxi, non quod ipsius Celsitudinem aut alios in Germania Principes, ad quos hac de re reverenter scribo, aliquem suo nomine ideo huc missuros petere audeam, sed saltem quo conscij sint, ut si forte aliquem ex suis Legatis tum temporis hîc in aula habuerint, illis festivitatem hanc loco sui Principis coram condecorare liceat, quod et te, charissime Domine D. BACHMAISTERE, ob veterem inter nos necessitudinem non cælandum duxi, quo vota tua ad Deum omnis boni et felicitatis largitorem nostris coniungens, fausta et salutaria huic actui preceris.

Miror te literas D. D. CRAGIO inscriptas non accepisse. Nullas nunc ad ipsum ulterius mitto, siquidem intellexerim ipsum in Legatione Polonica abesse, sed tabellario huic nonnullas tradidi, quibusdam in Dania præcipuis amicis destinatas, quarum maxima pars est invitatoria ad iam dictas nuptias; eas vero omnes ipse tabellarius facile per quendam nobilem, ESCHILLUM BILLÆUM nomine, res meas istic procurantem, expediet. Addo minutulasA quasdam ad eundem Regis Musicum, cui alteræ prius tibi missæ (ut opinor) inscribebantur, quas hic ipse grammatophorus, si tibi commodior non suppetit ratio, illi Hafniæ inquisito tradet; sunt a quodam hîc Italo, in cuius aliquantul[a fideiussione?]A Musicus est, scriptæ.

Magistro BRASCHIO ipsemet nunc de negocio prius insinuato rescribo; antea enim non vacabat.

Quæ a CAROLO Sueciæ Duce in Livonia acta sunt, iam antea hîc cognovimus; nimis tardus esse videtur in resistendo Poloniæ Rex, et vix ut ENNIUS de altero isto Romano aiebat, cunctando restituet rem: celeritate potius in talibus opus est. WAIWODA, qui in Comitijs Polonicis etiam hostis eius Regni declaratus est, nuper hîc fuit, et gratiam Cæsaris impetravit, acceptaque magna pecuniæ vi Transsylvaniæ partem Polonorum consilijs et Tartarorum invasionibus nuper amissam pro Cæsare recuperare meditatur, omniaque strenue ad hanc expeditionem præparat. Magnis etiam viribus contra Turcam exercitum parat Imperator noster, validiorem quam unquam antea, siquidem necessitas sic postulet, ob amissum superiori Octobri Canisium, fortissimum Hungariæ propugnaculum, quo occupato Turca sibi viam, sive Styriam sive Austriam infestare velit, præstravit; armipotens et fortis Deus eius ferociam et tyrannidem retundat atque a cervicibus Christianorum avertat. Ubi plura aliquid momenti habentia resciero, te eorum faciam participem. Vale cum omnibus tuis quam felicissime, et senij, si quæ, uti fit, incidunt gravamina, patientia vince. Dabantur Pragæ ex ædibus olim Curtianis, quas Cæsar pro 10000 millibus Ioachimicorum in meos usus liberaliter emit vix duplo maioris exædificatas, quæ novum Uraniburgum Rudolphæum appellanda.