DURCHLAÜCHTIGSTER hochgeborner fürst, gnedichster herr. Ewer Fürst: Gnaden sein meine vnterthenigste gantzwillige dienste iederzeit höchstes fleißes bevor. Vndt soll deroselben abermahl vnterthenigster gueter wohlmainung nit pergen, welchergestallt ich zwar vngezweiffelte hofnung gefast gehabt, es wurde von Ewer Fürst: Gnaden rentmeistern Andres Meyern vnserem wegen dero 10000 thalern auffgerichteten contracts vnd auffkundigungesbrieff (inmaßen sie zue rechter zeit beschehen) zufolge mihr sölliche summa sampt dem interesse gegen vergangenen ostern ohne ainige fernere verzugerung dageraicht vndt gefolget sein. Weiln aber damalß wegen anderer von obgemeldten h: rentmeistern angereugter hohen vndt notwendigen außgaben sölliches nitt geschehen können (wiewohl zuvor die auffkundigung ohne ainigen bedencken ahngenohmen vndt ich meine sacchen alhie darnach gerichtet, auch andere leutte darauff vertrostet, vnd dardurch in keinen geringen schaden gerahten), so hab dennoch E: F: G: zue vnterthenigsten diensten vnd meinem schaden vngeacht ich biß das gegen vergangen s: Johan: der hauptstuel sampt dem interesse richtig erlegt vndt mir zuegestelldt würde (wie dan mehrgedachter h: rentmeister mir abermahl schriftlich versprocchen) mich gedulde[t]. Weiln dan dießer ander termin abermahl lengst verfloßen, alß nehme ich in kainen zweiffell, E: F: G: werden eß durch den rentmeistern schon dahin gedirigirt vnd gebracht haben, daß söllich geldt schon richtig verhanden, damit ich die burgen einzuemahnen nitt genotdrenget werde. Vndt bin derowegen eine gewiße pottschafft alßpaldt derer örtter daßelbige anhero zuholen abzuefertigen ihn willens.

Gelanget derowegen ahn Ewer F: G: mein vnterthenigste gantzfleißige pitt, sie geruhen den gnedichsten befehlich vnd anordnung zue thuen, damit derselbige, sopaldt ehr anlangen wirdt, nit damit auffgehalten, sondern ehist sich sampt dem gelde wiederumb anhero zue versfüegen gefurdert werden muege.

Diß vnd andere gut vnd wohlthatten vmb E: F: G: gehorsambst zue verdienen, will ich mir stetz zum höchsten angelegen sein laßen. Ewer F: G: sampt dero vielgeliepten gemahlin hiemit göttlicher allmacht vnd zue dero fernern gnaden mich vnterthenigst vndt getreulich entpfhelendt.