VON Gottes gnadenn Vlrich, hertzogk zu Mekelnburgk etc. Ehrsamer lieber getrewer. Was Eßke Bilde der 10000 tahler halbenn, damit Vnsere vnmündige vettern vnd pflegesohne, die jungen hertzogen zu Mekelnburgk etc., Tycho Brahen verhafft, an Vnseren cammerer Jochim von Stralendorffen abermals gelangen thuet, das hast du aus beyuerwartem seinem originalschreiben nach mehrer lenge zuersehenn.

Nun seind Wir der meynung, es werden die zehen tausend thaler sampt den zinsen, so gemelter Tycho Brahe haben soll, noch beysamen seinn, das sie auff begeren gegenn wiedereinandwortung der außgegebenen verschreibung alßbald außgezehlett werden konnen, wie Wir dan solches newlicher zeit, jnmaßen du aus inligender copey zuuernehmen, von Vns geschriebenn. Weil aber Eßke Bylde vnter andern in seinem schreiben gedenket, das sich gestern abend einer bey jhm zu Rostogk angegeben, so jhm von deinentwegen angemeldet hette, das du obgedachtenn Tycho Brahenn 5000 thaler hinauff nach Prage vbermachet, vnd Wir nicht wißenn können, was es hirumb vor eine gelegenheit hat, alß begeren Wir demnach an dich hiemit gnediglich, das du Vns vngeseumet bey zeigern hieuon eigentlichen vnd gewißen bericht zuschreibest, dan weill Eßke Bilde selbst vmb des geldes willen aus Dennemarken gekommen ist vnd zu Rostogk liegt, konnen die sachen gar keinen verzugk leiden. Vnnd haltenn Wirs auch dafür, weil du Vns das geringste dauon nicht angezeigett, das du das gelt hinauff nach Praag soltest vermachet haben, welches dan auch Vnsers bedünckens vor wiedererlangung der außgegebenen verschreibung nicht fuglich hat geschehen können, es werde die gantze summa noch bey einander seinn, damit es volnkomlich, sintemal es Eßke Bilde auch volnkomlich haben will, außgezehlet werden könne vnd müge. Vnd wirst du zeigern mit der begertenn andwort desto zeitiger wiederumb an Vns abfertigen, damit Wir dieselbe noch vor vnserm auffzuge von hinnen (so ob Gott wil am zukünfftigen dingestage morgen geschehen wirdt) gewiße mügen vberkommen. An dem erstatest du Vnsere gnedige zuuerleßige meynungk.