Homeister. Noch fruntlichim gruse. Ir burgermeister und ratlute wisset, das her Alard vom Sunde, der an den kuning von Denemarken gesant wart, uns enpotin hat, wi das her by dem kuninge da gewest sy und syne botschaft da gewurben habe. Des ist der kuning czu rate wurdin und hat syn eyne tag genomen uf sente Iohanis baptiste tag, also das der kuning selbir czu dem tage czum Sunde komen wil uf die selbe czit. Darumme bitte wir uch, das ir uweren rat czu uns sendit, also das sy by uns syn czu Marienburg bis dinstag czu tercien cz{ie}t. Ouch tut wol und richtit us eynen virstendigen, virrichtigen man und redelichen botin, das der mete kome, ab man is czu rate werde, das der sundir eyns ouch czu dem tage cz{ie}. Und wand di czit kurcz ist und nu{e} der kunig selbir dahen komen wil, als man sait. Ouch was uwere burgere von des kuningis wegin schadin genomen haben, das losit eigintlich beschriben, das man das mete dahen czum tage brenge. Geg[eben] czu Mar[ienburg] am dunrestage in der Pfingist wochen.