Wy ratmanne der stede Lubeke Rostok Stralessunde vnde Wysmer bekennen vnde betůghen openbare in dessme breue dat wy endrachtliken mit den dorluchteghen vorsten hern Alberte koningh to Sweden hern Alberte hertoghe to Mekelenborgh vnde hern Hinrike vnde Magnusse synen sone dor manigherleyghe vndrachtlikes schaden vnde vnrechtes willen dat koningh Woldemar van Denemarken vnde Haquin koningh van Norweghen vs vnde dem menen koopmanne binnen vrede vnde velicheyt daen hebben vnde noch doen sůnder vnderlaed hebben vs vorenet vnde vorbunden an ene trůwe vaste vorbindinghe vnde hulpe vser een dem anderen to doende ieghen de vorbenomeden koninghe van Denemarken vnde van Norweghen vnde ieghen errer beyde rike vnde ieghen alle ere hulpere in desser wis dat wy raetmanne der vorbenůmeden stede in dessen krich v{ov}ren sc{ov}len mit den steden van der Wendeschen siden vsen hůlperen důsent man ghewapent mit schepen de vs daer nůtte to důnken

Vortmer scholen de Průceschen stede vnde de van Kampen vnde ere hůlpere van der Sůdersee ok voren in dessen krich důsent man ghewapent Were auer in den van Průschen vnde in den van der Sůdersee ienich ghebreke in den dusent ghewapent wan dy sammelynghe to hope kůmpt wo vele dan enbrekt in den vorbenomeden dusent ghewapent also vele moghen ok de koning van Sweden vnde de herthoghen van Mekelenborgh vorbenomed na mantalen eren hupen mynneren den se in dessen krich voren scholen oft se willen in dem ersten* iare van dessen twen iaren desser vorbindinghe

Vnde dor desse vormynneringhe willen scholen desse vorbenomden heren de slote Wittenborgh vnde Rybbenisse nicht vorbreken an us edder an usen hůlperen, wo se voren also vele, als en na mantale dan to vorende bored als van den vifhůnderden ieghen de důsent

Unde welkere van dessen twen partighen, als van den Průcen unde den van der Sůdersee, nycht en kůmpt to user vorbescrevenen sammelynghe, de en scholen nicht brůken der vryheit, de wy in dessem kryghe vorwerven, id en were, id en wedder unde wynt beneme, dat se bewysen mochten

Men in dem anderen iare scholen desse vorscrevenen heren io by erem villen talle blyven als dusent ridderen unde knechte, oft de van Průcen unde de van der Sůdersee daer wol nicht to komen

Unde wy ok by useme talle als dusent ghewapent.

Desse vorbindinghe schal anstaen nů des sůndaghes to vastelavende, de negest kåmpt, unde schal waren mit den vorbenomeden heren unde mit us unde usen hilperen als den steden van der Wendesschen syden wente to paschen, de neghest kůmpt, vort over twe iar.

Unde mit den steden van Průcen unde van Kampen unde eren hulperen van der Sůdersee schal id waren went to paschen, de nů neghest kůmpt, vort over een iaer.

Unde bynnen dessen twen vorbenomeden iaren schole wy us mit den vorbenomeden koninghen nymber daghen, sonen edder vreden edder bevorworden, wy en doen <dat> mit gantzer vůlbort der vorbenomeden heren edder der erer, den dat van erer weghene bevolen is.

Vortmer were, dat uns god hůlpe, dat wy bynnen dessen vorscreven twen iaren in desser vorbindinghe, de wile se ware<t>, slote edder gulde bekrechtegheden in Schone, wes wy darynne bekrechteghen binnen der tid, id sy in sloten, landen, rente, gůlde, tollen, můnte edder wor id an sy, dat scholen de vorbenomeden heren unde ere erven halp hebben, unde wy scholen hebbe<n> de anderen helfte vor use koste, de wy doen, unde vor usen schaden, den wy nemen in dessem kryghe bynnen desser vorbenomeden tid der vorbindinghe.

Unde wan wy de vorbenomeden koste unde schaden daerut upghebored hebben, so schole wy use vorbenomede helfte noch twe iare, de darna neghest komen, ynne hebben; unde wan de twe iare erst umme komen synt, so schole wy de vorbenomeden heren unde eren erven desůlven use helfte, id sy in sloten, edder woran id sy, wedder antwerden.

Wůrden se aver us entfernet, so schal men dat holden, als hirna screven steyt, unde wy scholen dan dar nicht mer ynne hebben.

Unde wes wy bekrechteghen in Schone, id sy lůttik edder vele, dat schal man delen in desser wis.

Wy scholen delen, unde de vorbenomeden heren kesen, edder sy scholen delen, unde wy kesen.

Unde wat wy bekrechteghen in al dem koningrike to Denemarken, dat schal der vorbenomeden heren allene wesen, behalven dat hus to Kopenhaven, dat schal men breken als der heren breve lůden, de se us ghegheven hebben.

Vortmer scal koning Albert van Sweden unde hertoghe Albert Hinrik unde Magnus syn sone vorbenomed edder welk erer dan Schone beholt, us unde al den, de use hulpere synt in desser vorbindinghe, ane den, de komen schulden unde nicht en komen, beseghellen de vryheyt de hertoghe Albert vorbenomed us in denkebreven alrede beseghelt heft mit synen ingheseghellen.

Unde wanne desse vorbenomeden heren us allent dat, des sy in dessen vorsprokenen stůcken us plichtich sint to holdende na erer breve lůde, de se us daerup ghegheven hebben, also gheholden hebben, als ere breve luden, so schole wy edder de use den vorbenomeden heren ere vorbenomeden slote als hus to Wittenborgh unde de stad to Rybbenitze sunder ienigherleyghe vortogheringhe hulperede unde arghelist wedder antwerden.

Worden se aver us entfernet, so scholde wy dat holden, als hirna screven steyt.

Vortmer alle de wile, dat wy edder de use de vorbenomeden slote Witteborgh unde Rybbenitze innehebben, so schole wy unde de use der vorbenomeden heren man unde borghere daerynne by rechte laten.

Ok schole wy erer manne nyn, daer se likes unde rechtes over mechtich sint, ute den vorbenomeden sloten vorvaen.

Ok en scholen ere man, daer se likes unde rechtes over mechtich sint, de iene, de wy in unde up den vorbenomeden sloten hebben, nicht wedder vorvaen.

Vortmer were, dat god vorbede, dat desse vorbenomeden slote Wittenborgh unde Rybbenitze edder erer ienich us, de wyle sy use pande sint, afghewůnnen ofte ienegherleyghe wis entfernet wůrden, dat schal us ane vorwyt unde ane manynghe wesen. men so schole wy den vorbenomeden heren unde se us wedder helpen met gantzen trůwen, dat wy desůlven slote wedder bekrechteghen unde wedder in use were krighen, unde dat wy se beholden in der wis, als vorscreven is.

Dessulven ghelik schal user een dem anderen helpen, oft se bestallet worden.

Were aver, dat wy en de vorscrevenen hůlpe nicht en deden, daer moghen se us umb manen.

Were ok, dat wy bynnen der tid desser vorbindinghe ienich slot up Schone in use were kreghen, als desse deghedinghe stan, de schole wy bewaren sunder arghelist, als wy best kůnen.

Were aver, dat god vorbede, dat us dersůlven slote welk afghewůnnen edder ienigherleyghe wis entfernet wůrde, dat schal sůnder wyd unde manynghe wesen.

Des ghelyk were, dat de vorbenomeden heren edder erer ienich in Schone bynnen der vorbenomeden tid ienich slot in ere were kreghen, dat scholen se bewaren sůnder arghelist, als se best kůnen.

Were aver, dat god vorbede, dat en der yenich afghewůnnen edder ienigherleyghe wis entfernet wůrden, dat schal en ane vorwyd unde ane maned wesen.

Wolde ok god, dat wy Godlande wůnnen, dat schal bliven by koningh Alberte unde by sinen ryke to Sweden.

Vortmer neme <wy> vromen in vanghenen edder in name, den schal men delen, als bůterecht is.

Vortmer were, dat ienich here edder man der vorbenomeden heren edder use edder erer ienich edder user ienich viend worde edder vient werden wold dor desses kryghes willen, dar schole wy umb tosamende riden unde vorsoken, oft wy dat in deghedinghen unde in guden sliken kůnen.

Were, dat wy dat nicht doen kånden, so schal user een den anderen daeran doen, als he van em nemen wolde.

Were ok, dat de vorbenomeden heren edder erer ienich edder erer hulperen ienich mit den eren to desser hulpe nicht komen kůnden to rechten tyden van weddere unde van wyndes weghene, kunden sy den dat bewisen, dat id en wedder unde wynt benomen hadde, se en schulden daerin den vorbenomeden sloten noch in anderen stucken nenen schaden ieghen us unde de use umb nemen.

Vortmer schole wy den vorbenomeden heren in allen vorbenomeden saken alle dynk sunder arghelist to dem besten keren.

Alle desse dingh stede vaste unde untobroken to holdende lowe wy borghermestere, ratemanne unde menheyt der vorbenomeden stede Lubeke, Rostok, Stralessund unde Wismer den vorbenomeden heren koningh Alberte, hertoghen Alberte, Hinrike unde Magnuse, sinen sonen, unde eren eruen in guden trůwen ane arghelist in dessem breve, daer wy to tůghe unde to groterer bewarynghe user vorbenomeder stede ingheseghelle anghehenghet hebben, de ghegheven is na godes bord drutteynhundert iaer in dem achteundesestegesten iare des sůndaghes vor vastellavende.