Premissis in domino amicabili salute et sincera et eciam promptitudine mei famulatus ♦ Ik bidde iw, Brun Warendorp, borghermester tho Lůbek, Thomas Morkerke, radman to Lůbek, Busse vorn Holte van Rostoch, Arnd van Zozad, radman tho Sunde, Herman Cropelin vnde Hinric Wessel, radlůde van der Wismer, Ziuerd van Lybek, radman van Gripeswald, Thideric Wacker van Stetin, Dethlef Verchemyn, radman tho Kolberghe, dat gi wol doen vnde holden mi dat, dat gi mi hebbet louet mit hande vnde mid munde vnde dar gi mi vnde anderen guden lůden iuwen open bref hebben vp ghegheuen. wente mi des is wedderstal ghedaan van iuwer weghene vnde nicht van koningh Waldemers weghene edder siner* denere weghene. ♦ Edder bidde ik iw, dat gi mi veleghen tho Lubek, tho Rostoc, tho der Wismer edder tho deme Sunde. ♦ In der stede eyn dar wil ik komen, vft god wil, vnde wil nemen also vele, also recht is, ist dat gi mi dat doen wil<len>. ♦ Ist ouer, dat gi des nicht doen willen, so wetet dat, dat ik iw wil scelden vor heren, vor vorsten, vor ridderen vnde vor knechten, also ik oueleste mach. ♦ Ualete in Christo, michi precipientes. ♦ Datum Helsingborch ipso die beate trinitatis Detleui Meynerstorp patrui mei sub sigillo proprio deficiente. ♦ Hec ego Timmo Meygnerstorp, uester humilis. ♦ Responsum peto.