Homeister Deutschis ordins. ♦ Erbarn liebin getruwen. ♦ Wir danken euch flislichin ewirs guten willen, den ir uns dirczeiget hat doran, das ir Iohan Stolczenfues, ewirn burgermeister, noch unsir bete und begeer gesandt hat, als czu dem tage der losunge des kongis czu Sweden und der synen; dy ouch von gotes gna den wol geendet ist, als her euch das wol wirt undirrichten. ♦ Her hat sich ouch bie allen dingen mit den andirn unsirn steten, dy mit im of dem tage gewest sint, getrulich gearbeit und gutwillig bewyset, das wir im groslichin danken; und bitten euch, lieben besundern getruwen, das ir im desselbin von unsir wegen ouch wellet danken. ♦ Ouch so wirt her euch alle sachen, wy is czwisschen dem konge czu Swedin und der konginne von Denmargt entricht ist, und ouch von dem Holmen und andir sachen, doby her mit etlichin unsirn steten und ouch andirn steten gewest ist, und do etliche ding gehanttyret habin, wol undirrichten. ♦ Und bitten euch flislichin, da ir in gutlichin horet, und mit im doruff gedenket und czu rate werdet, und uns ewir gutdunken vorschribet, so wellen wir mit unsirn steten ouch doruff gedenken und prufen, was nuczlich und fromlich sie czu thun bie allen dingen. ♦ Gebin uff unsirm hofe Grebyn an sente Mertins obund anno xc quintoA.