Do wi dat lant van Gotlande sichtich worden Haborch do zege wi schepe vnder deme lande. ♦ Don sande wi vnse scnikken van vns dat ze scolden zen wat schepe dat it weren ♦ Do de scnikke bi en quam do schoten ze to en mit bussen vt eren schepen ♦ Vnde de snikke quam wedder. tho vns vnde zeden. dat dar lude tho harnsche wern. men ze wůsten nicht wat lude it weren ♦ Des zegelde wi Lubeschen to en vnde do wi bi en qwemen do vragede wi en van wenden dat ze weren dat ze myt wapender hant yn der ze weren ♦ Des antwarden ze vns ze weren van Calmeren ze wolden de zee vreden. ♦ Der wort louede wi Lubeschen.

<2> Dar na quemen de Prucschen myt eren schepen vnd villen ouer bort to en yn mit gemacht vnde vengen ze vnde vorden ze yn ere schepe vnde repen vppe de van Lubeke. ♦ Vor vmme gripe gi desse lude nicht an. vnde helpen vns hir to wente it syn openbare zerovere. ♦ Don de Prutzen dit gedan hadden do sanden ze vns houetlude van Lubeke boden dat wi to en komen scolden yn ere scepe ♦ Do queme wi to en. ♦ Do openbarden ze uns ♦ Hir hebbe wi de zerouere. ♦ Des antwarden wi en ♦ Wi en loue<de>n des de<n> Calmernschen nicht tho dat ze de ze roueden. ♦ Item des worde wi {ee}ns mit den Prutzen in der iegenwardicheit der vanghene<n> wi wolden de vange nen voren vor de stad to Gotlande ♦ Were it zake dat dar iennich kopman ouer clagen de were dat ze em dat zyne genomen hadde<n> so scolde me ze richten in ere hogeste. ♦ Alzo bleue wi noch vnder deme dage wente des andern dages.

<3> Des sanden vns ouer de Prutzen boden dat wi scolden to en komen in ere sche pe ♦ Do wi to en quemen. do zeden ze ze wolden richten. ♦ Do antwerde wi ♦ Gi heb bet des wol macht wi wilt dar neyn vůlbort to geuen. ♦ Des zeden de van Dantzike ♦ Gi van Lubeke gi zynt Densch gi synt den Denen wol bewegen ♦ Des antwerde wi en ♦ Wi en wilt nyn dingh don wi en dont mit rechte.

<4> Des andern dages dar na do zegelde wi na der stad tho Gotlande. ♦ Do worpen de van Danczk ere vangene ouer dat mestendeel vnde repen vp de van Lubeke ♦ Vorreders gi vorheghet de Denen. vnde schoten inte vnsen scnikken myt armborsten vnde mosten vor en in vnseme harnsche liggen alz vor den vienden.

<5> Do wi done quemen vor de hauene tho Gotlande do voren de houetlude thovoren to lande alz de van Thorn de van Elbing vnde van Danczik vnde hadden syk vor gaddert in vnser vrouwen kerke ♦ Dar schuldegeden ze vns Lubeschen wor vmme dat wi vtgekomen weren dat wi nicht richten wolden ouer de zerouere vnde gi ze io vordegedingen willen. ♦ Do suluen hadden de van Prutzen clegere bi syk. ♦ De erste clagede dat he were segelt vte Zweden do he quam vor de hauenen to Gotlande dar nemen em de Calmerschen vt syme scepe allent dat he hadde. ♦ De andere cleger clagede dat he gelegen hadde vppe Hoborch vppe der wischscherige dar hadden ze eme syne kisten vpgeslogen vnde hadden em dar vt genomen wes dat he hadde. ♦ De dorde clagede dat se hadden gewesen in eyme schepe van Danczk vnde hadden alle ere tow dar vt genomen. ♦ Dat ward bi en gewnden in den Calmerscen scepen. ♦ Vnde desser clegere weren mer wen teyne edder xi. ♦ Dit hore gi nv wol gi van Lubeke.

<6> Do wi wedder to scepe ghingen do slogen de van Danczke vp vns vnde repen ♦ Sla doet de vorreder van Lubeke wente ze hebben den Denschen got ♦ Des slugen ze vnser twe doet. vnde achte wunden se. ♦ Vnde wi houetlude vnde schepheren quemen nowe tho schepe.

<7> Ouer sanden se vns baden dat wi to en in ere schepe komen scolden. ♦ Do wi to en quemen. do clagede wi vnse not dat wi ouel gehandelt weren mit worden vnde de vnseren weren vns affgeslagen vnde affgewnt wi en wolden nicht lenger bi en blyuen wi wolden wedder segelen vnde clagen vnsen heren vnse not. ♦ Des seden se wi scholden nycht wech zegeln wi scolden ouer de vangen helpen richten. ♦ Ouer velen reden worde wi des eens. dat ze scholden richten ouer ere vangene wi wolden richten øuer de de wi hadden.

<8> Des suluen auendes eynes vrygdages do worpen se ouer ere vangene vnde wi helden vnse ynne bettes sůndages vnde wolden se hemeliken tho Lubeke gesant hebben. ♦ Do dat den Pruschen to wetende ward dat wi ze noch inne hadden. don schulden se vns echter. ♦ Wor umme holde gi des nicht des wi eens ghedregen hebben. vnde io synt gi den Denen bewegen ♦

<9> Bynnen der tiid alz wi to Gotlande schededen to zeghelnde do were wi des eens dat me nemande ouer werpen scholde. iodoch worpen de van Prutzen see en deel ouer er wi tho Gotlande qwuemen de wi Lubeschen reddeden myt vnser scnikken. ♦ Dar umme repen ze vp vns ♦ Gi holdent mit den Denen vnde syn vnser rechte vorreders.