Eynfeldige befelunge vnd willigen dinst aller behegelichkeit beuor ♦ Allirdurch<luchs>te forstynne grosmechtige gnedige frauwe ♦ Euwir allirdurch luchsten grosmechtikeit brieff vnd botschafft by euwer hochwirdigen grosmechtikeit canczeler an vns gesant habin wir mit czemelichir irbarkeit entpfangen vnd wol vornomen ♦ Worumme allirgnedigste frauwe euwir grosmechtige gnade geruche czu wissen das wir noch deme als wir euwir durchluchtikeit botschaft vornomen hattens wir vns vmb eyn semelichs mit vnserm rathe beryten/ off das wir euwer hochwirdige durchluchtikeit deste annemer vnd vfrichtiger antwerte thun mochten vnd sint des gnedige frauwe sampt mit den vnsern vns beratende eyns worden uff das wir vns in den sachin deste sycher an vnsern eren vorwaren mogen/ das wir dyselbe obingedochte euwir hochwirdigen grosmechtikeit begerunge vnd botschafft an vns gethan/ als wir erste mogen schriben wellen an vnser sachwalden/ von der gewalt vnd willen wir das land vnd dy stad czu Gotland vor eyn pfant in vorsacczunge innehalden/ ♦ Gnedige allirdurchluch<s>te grosmechtige frauwe/ was vns von denselbin widder wirt vor eyne antwert/ das wellen wir euwir durchluchtikeit so wir allirerste mogen gerne schriben/ wendt vns allirgnedigste frauwe als euwir hochwirdige grosmechtikeit unczwiuelich en semelichs bas dirkennet/ ane derselbin wissenschafft in den sachin keynes fuget czu thunde czu desir cziet/ bittende mit grosser andacht das euwir hochwirdige grosmechtikeit dese kegenwortige vnser antwert mit gunst geruche offczunemen vnd mit gedolt wandt wir hoffen dy wyle dy vorgeschriben stad vnd landt czu vnsir hand steen das wir bliben wellen in euwir grosmechtikeit holden als wir euwir hochwirdige grosmechtikeit des wol czugetruwen vnd genczlich hoffen ♦ Gegeben czu Marienburg am sonobunde vor Symonis et Iude im xcix iare.