Wytlik scal wesen allen goden luden de dessen bref zeen vnde høren lesen dat ik Mickel Saxson bůvoget to Schanøre Ludeke Wyttouwe børgermester Wer neke Iøns Ingemersson Magnus Rycqwartson Hans Sternenbergh bů lůde dar selues wy bekennen vnde betůgen openbare in desseme iegenwørdygen breue dat Ludeke Wyttouwe myt synen erfnamen heft gheschøtet vp vnseme dinghe to Scanøre Tydeken Myntebeken vnde synen erfnamen ene boden myt der erden de dar lycht in den knøkenboden to Scanøre vppe de western syden tůsschen Peter Karlsons boden vnde Lambert Stenwerkes boden brede vnde lenge dat der erden to behøret en to ewygen tyden to besyttende ♦ Vart mer so vor bynde ik my Ludeke vorgenømd myt mynen erfnamen deme vorbenomden Tydeken vnde synen erfnamen de erden to vrygende vnde entledygende vor al ansprake gheystlik eder wertlik de nv leuen vnde noch to komen møghen wesen sunder alle argelyst eder weder sprake ♦ Tho ener betern bewaringe vnde tuchnisse desses breues so hebbe wy vorgenømden lůde alse Myckel Saxson Ludeke Wyttouwe Werneke Iøns Ingemerson Magnus Riqwartson Hans Sternenbergh vnse inghesegele ghehenget an dessen bref de gheschreuen ys to Scanøre na godes bord druttenhundert iar in deme negenen vnde negentigesten iare des vrydages vor sunte Mertens daghe.