Eynfeldige befelunge etcetera ♦ Allirdurchluchste forstynne grosmechtige allirgnedigste frauwe ♦ Euwir grosmechtige durchluchtekeit wir senden in desem briffe vorslossen die vsschrifft des allerdurchluchsten herren konigs briffe den vns syne grosmechtikeit nw kurtz gesandt hat vor eyne antwert vff euwer hochwirdigen gnaden vnd vnsern brieff ym nuwegelichste gesandt in dem selben sich syne herlichkeit tzum rechten dirbutet alzo euwer grosmechtige wisheit in des briffs vsschrifft mag vornemen ♦ Allirdurchluchtste grosmechtige allirgenedegeste frauwe ♦ Dorvmme zo bitten wir uwer hochwirdigen genaden sunderlich begernde. das yr gnadege forstynne euwer hochwirdikeit geruchet tzu demutegen czu eyme tage vff eyne mogeliche cziet vnd stadt mit dem herren konige tzusampne tzu komen die sache ab got vnser herre syne gnade dortzu keren welde tzu vorrichten vff das wir vns dor vndir in den sachen von des landes czu Gotlandt wegen ken dem herren konig vnd an allen andern enden wo wir do von tzu sachen haben mogen in fruntlicher enthaldunge an vnsern eren vnd ane vnsern nemelichen schaden deste bas vorwaren/ wand euwer grosmechtigen gnaden als wir vntzwifelichen hoffen nicht vnwissintlich ist das wir das selbe land czu Gotland mit grose muge vnd mit vil arbeyt vnd koste von der rowber hende bekrefftegeten nicht alleyne vnsern landen sunder vs vil andren landen dem gemeynen kowffmanne czu frede vnd tzu fromen vnd bitten euwer grosmechrtege gnaden genedege forstynne vns des euwer trostliche gnedege antwurt widdir czu schriben dy wir dem grosmechtegen herren konige vortan die sache czu eynem begerthem ende seliclich tzu vordern mogen senden ♦ Got der herre beware euwer hochwirdege durch/uchtekeit in langen begerthen glukseligen tagen ♦ Gegeben czu Marienburg am sontage Letare im xiiii^c iare.