Eynfeldige befelunge vnd willigen dinst czu allir behegelichkeit czu vor ♦ Allirdurchluchste furstynne grosmechtige gnedige frauwe ♦ Euwir grosmechtikeit brieff vns nulichst gesant habin wir wirdiclich entpfangen vnd wol vornomen innehaldende das wir euwir hochwirdigen durchluchtikeit welden lassen wissen wenne vnd wo vnser bothe by euwir durchluchtikeit sien sulde/ ♦ Grosmechtige besunder gnedige frauwe ♦ Vns wart in vorczieten von nemlichin irbaern luten czu wissen wy das euwir grosmechtikeit in verren landen als in Ybtlandt were dorumme wir is vorczogen/ vnd hatten willen vnser boten an euwir durchluchtikeit czu senden wo man dy selbe am nesten vynden mochte alzo mochten wir keyn gewissers dirfaren den das wir off desin nesten senthe Iocobs tag dy selbin vnser bothen czu Calmar senden weldens ader nv wir in desim leczten euwir grosmechtigen gnaden briefe geschrebin vynden/ wo vnd wenne wir dy botschaft senden wellen/ wir etwas czwiuelnde von euwir gnaden czukomft doselbis czu Calmar/ dorumme wir dy selbe vnser botschaft an euwir grosmechtikeit czu senden vorczogen habin/ so lange bys das wir euwir durchluchtikeit wolbehegelichkeit vnd briefe dorynne widder habin/ uff welche gewisse stad vnd tag wir dy selbin vnser bothen an euwir grosmechtikeit senden sollen worumme allirdurchluchste furstynne grosmechtige gnedige frauwe euwir grosmechtigen gnaden wir bitten vns czu schriben eynen gewissen nemlichin tag vnd stad do vnser bothen an euwir grosmechtikeit komen mogen vnd als wir des in euwir grosmechtikeit briefen underricht werden do welle wir vns gerne noch richten/ vnd vnser bothen ane sumen senden euwir durchluchtikeit all vnsers willen volkomelich czu underrichten ♦ Ouch geruche euwir grosmechtikeit czu wissen das wir euwir gnaden brieff dem herren koninge gesant habin in der gebunge dys briefes vnd wellen euwir hochwirdikeit dy antwert des herren koninges dovon gerne widder schriben wendt wir vngerne welden anders begern vnd wissen czwisschen euwirn grosmechtigen gnaden vnd euwerm lybin sone/ vnserm herren dem koninge/ denne begerte eynunge/ mynne vnd fruntschaft vnd sunderlich von des landes wegen czu Gotlandt/ das wir yo als euwirn grosmechtigen gnaden vnd vyl andern wol wissentlich syn mag von nymandt anders den von der zeerowber gewalt entweldiget habin/ durch vnsers ordens vnd unser armen luthe vnd des gemeynen kowffes grose not wille/ vnd dornoch von des herren koninges vorsecczunge vnd nicht von eygener gewalt innehalden/ wendt wir vns yo allecziet dirbyten vnd bereyt sien/ von dem selbin lande abeczutreten weme wir mit rechte sollen/ wenne vns vnd vnserm orden dovor eyn mogelichs widderfaren mag/ ♦ Vnd ab imandt vor euwir grosmechtikeit obir vns ader vnsern orden anders reden welde/ bitten wir das ir gnedige frauwe des nicht geruchet czu gleyben. sunder vnser entschuldigunge czuvor gnediclich czu horen/ vnd ab wir eyngerley ding hie in vnsern landen euwir grosmechtikeit czu willen vnd czu lybe thun solden das wellet vns gnedige frauwe enpiten/ dorynne wir vns williclich gerne euwirn grosmechtigen gnaden czu willen bewisen wellen ♦ Gegeben uf vnserm huse Danczk am fritage noch corporis