Rex uicecomitibus Londonie/ salutem. ♦ Supplicauit nobis Petrus Janessoun subditus carissimi consanguinei nostri ducis Alberticomitis Hanoun Holande et Selande ac marinarius et possessor cuiusdam nauis uocate le Cristofre de Amsterdam ut cum ipse per unum annum et amplius seruiens conductionis ligeorum mercatorum nostrorum ciuitatis nostre predicte cum naue sua predicta diuersis mercandisis ipsorum mercatorum nostrorum carcata uersus partes Prucie Scone et alibi retentus fuisset. ac postmodum uirtute cuiusdam breuis ad suggestionem cuiusdam Thome Lounde de Norwicomercatoris uicesimo sexto die ianuarii ultimo preterito uobis directi dicta nauis absque aliquo demerito suis culpa eiusdem Petri arestata extitisset et eam sic sub aresto adhuc detineatis minus iuste in ipsius Petri dispendium non modicum et grauamen ac dampnum et preiudicium manifesta. ♦ Uolumus eidem Petro pro disarestacione et deliberacione nauis sue predicte una cum bonis et rebus in ea existentibus intuitu iusticie in hac parte graciose prouidere. ♦ Nos ex nostra regia benignitate premissis consideratis\ supplicacioni predicte contemplacione eiusdem consanguinei beniuole annuentes. uobis precipimus quod nauem predictam cum omnibus bonis et rebus predictis si occasione premissa et non alia sic arestata existant dearestari et eidem Petro sine dilacione deliberari faciatis aresto huius non obstante. ♦ Teste. rege apud Westmonasterium xxvi die februarii.

Per breue de priuato sigillo/