Ick Erich Krummedick riddere do withlick alle den iennen, de dessen, iegenwardigen breff shenn, høren, effte lesen, dat ick to lenende hebbe Iunnewatmarcke van herre Sueno abbete vnd deme menen conuente to Liughum clostere myne leuedage, alzo dat ick des bruken schal an myneme nutte, welker wiiss ick wiil vnd kan dewile dat ick leue, wanner myner to kort wert, so schal dat vorbenomede guth quit vnd loss van my vnd minen eruen wedder wesen des vorschreuen closters frii vnd vnbeworen, alze idt denne belegen is an siner scheide, en dar nichts vp to rekende van buwe offte koste, vnde se mi nicht wedder to gewende effte minen eruen. ♦ Des to merer bewiisinge, so hebbe ick Erich vorgeschreuen myn ingesegel, myt den ingesegelen bedderwerlude, alse is Peter Erichsones van Kuxbull, vnd Jeppe Nichlesones van Schaste vnd heren Johannis Broderson prester ghehengen heten vor dessen breff to tuge der warheyt, de schreuen vnd geuen is na godes bort mcd iar da nha an deme vifften iare, an deme sondage to palmen.