Einfelduge befelunge vnd willigen dinst czu aller euwer koniglichen beheglichkeit beuor ♦ Allerdurchluchste forstynne grosmechtige gnedige frauwe euwer hochwirdikeit brifN vns nest gesant haben wir wirdiclich empfangen vnd wol vornomen vnd als euwer durchluchtikeit schribet des die stete mechtig gewest sin czu vorramen vnd begernde siet das die vnsern vor adir yo vf pfingsten dorczu volmechtig quemen etcetera ♦ Hochmechtige gnedige frauwe ♦ Wir haben itzunt die vnsern dorczu vsgericht die ouch allerdinge bereit sin vsczusegeln czu dem tage als balde sie mit der almechtikeit gotes windes halben des sie von tage czu tage beyten mogen obirkomen vnd getruwen das sie biecziten genug dorczu komen werden mit der hulfe gotes der euwer grosmechtikeit wol farende geruche bewaren czu langen cziten ♦ Gegeben czu Marienburg am sontage vor ascensionis domini im xiiiic vnd fumften iare.