Homeister Dutsches ordens Lieben getruwen ♦ Die gebitiger der huszer Mewe und Roghuszen mitsampt den andern etlichir stete eldesten usgesant czur frowen konyngynnen von Denenmark do von euch wol wissentlich ist seyn am tage Marie Magdalene ken Marienburg czu uns komen die undir ander aller handelunge ire botschaft uns also berichtet haben das von beiden teilen vorramet ist und vorlibet von unser frowen tage nehestkomende vort obir eyn ior eyn ander tag czu halden czu Calamar do czu handeln obir die sachen und schelungen beider teile und das is bynnen der cz{ie}t und sechs wochen dornoch yn guter fruntschaft gutlichin und fredlichin sten sal bleiben also doch weres das off deme tage denne die sachen nicht geflegen wurden eyntrechticlich und offgenomen welch part denne was begynnen wil das sal is dem anderen sechs wochen czuvor vorkundigen und lassen sagen. Des seyn wir mit den selben unsern sendenbothen eyns wurden die eldesten unser stete eyn semelichs anrurende czu vorboten als wir euch ouch bitten dar ir czwene euwirs rathes eldesten usrichtet das die by uns seyn czu Marienburg vom sontage nehestkomende vort obir xiiii tage off die czeit wir den andern by vns czusien ouch entscheiden haben czuvorhoren eigentlichin wie alle sachen sich dirfolget haben und worby is ist bleben. Den tag euwir czusampnekomunge mit uns wir dirlenget haben umbe eyn sulchs ap die bothen von Engelant bynnen der czeit quemen der man sich von tage czu tage vormutet das man mit eynir mwe undireyns do von kome und forder bekommernys nicht me domete durffe haben ♦ Gegeben czu Marienburg am donrstage noch Marie Magdalene.