Ersamen libin vrunde ♦ Herre Tydeman Huxer vnsers rotis burgermeister der in Denemarken czu tage ist gewest hot mang andern sachin ingebracht w{ye} das die radissendeboten von Lubeke do selbis in Denemarken tzu tage wezende von yres rotis wegin vulmechtig dy schelinge tzwischen vnsern herren vnd vns von eyme teile vnd Claus Lembeke vnd synen vrunden vom andern teile entlich tzu vntscheiden tzu sich genomen habin also das man in eigentlichen scribin sal von allen schaden den vnsere herren vnd die yren von im vnd den synen vntpfangen habin ♦ Hirumme mogit ir der uwern schaden von der wegin vnd ouch den Denemarkischen schaden die uwern anrurende tzum nehisten tage tzu Marienburg bescreuen mite bringen wend man den Denemarkischen schaden vor Michaelis nehist komende der koninginnen sal obirsenden mit vorscribunge der genen by namen die den schaden geton habin vff das sie die selbin tzum nehisten tage der vff assumpcionis Marie nehist kommende vort obir eyn iar tzu Kalmarn vorramet ist czu halden vorboten moge denne recht dorumme tzu werden ♦ Ouch libin vrunde wisset ir wol das dy cziit hir ist eynen voyth hir vfme lande vff Schone tzu senden vnd das ys noch gebornisse itzunt an uch ist gekomen hirumme willet ouch dor czu gedenken vff das keyne vorsumnisse dor iu en sulle ♦ Gescreuen am tage Iacobi ccccv vnder vnser secrete

Rathmanne Danczik