Minen gar willigen gehorsam euwir gnaden vndirtaniclich tzuuor ♦ Erenwirdiger vnd gnediger libir meistir ♦ Als euwir gnade wol mag gedengken wie das euch Henning Clangsporn vor mir gelobete das her wolde irfurschen was botschafft her Iereslow by dem konge von Denemargkte habe gewurwin. ♦ Nu hat mir Henning Clangsporn gesaget wie das gener man sey komen den der hertzug von der Stulpe tzu dem konge von Denemargkte in botschafft gesant hatte vnde der hat my gesaget wie das her Iereslow nichtis andirs von synes herren konges wehen von Polan. an dem konge tzu Denemargkte gewurwin habe denne das her obir den ordin gros hat geclaget wie das dem konge von Polan grosse gewalt vnd vnrech von dem ordin werde tzu getzogen vnd hat den koning von Denemargkte gebeten das her synem herren konge von Polan obir den ordin tzu hulfe kome/ ♦ Nu hat em der koning von Denemargkte nicht andirs tzu antwert gegeben denne das her sich mit synem vettir als mit dem hertzug von der Stulpe dorvmme welle besprechin. ♦ Y dach so spricht gener man. der dest ding Henning Clangsporn hat gesaget. das man sich hir an keyns durffe besorgen wann der koning von Denemargkte itzunt mit synen eigen lantd vnd lwte. hat so vil tzu schaffin. das her selbir nicht weis. sich wo tzuwenden ♦ Gegeben tzu Slochow am sunabende vor Letare.

Kompthur tzu Slochow.