Wir Ruprecht etc. und wir Iohans von denselben gnaden pfalczgrave by Ryne und herczog in Beyern, des obgenanten unsers lieben herren und vaters des Romischen kunigs sone, bekennen und tun kunt offenbar an diesem brief, das wir dem edeln Hadmar herren zu Laber, Hans Truchsesszen von Balderszheim rittern und Conrad Castener unserm lantschriber zu Amberg, unsern reten und lieben getruen, volle und gancze macht geben hann und geben in crafft disz briefs zu teydingen, zu handeln und czu beslieszen ein hyraut und ee zuschent uns und dem obgenanten herczog Hansen uff eine, und der hochgebornen iungfrauwe Katherinn, der durchluchtigisten furstynn frauw Margrethen kunigynne zu Sweden, Denmarck und Norweyen, nifftel und des durchluchtigisten fursten herrn Ericks kunig czu Sweden, Denmarck und Norweyen swester, off die ander syten, und umbe zugelt, heinsture, wydeme, wyderlegunge und alle andere stucke, die sich czu solicher hyraut und ee gebürent, und waz darzu notdurfftig, nucze oder bequeme sin mag. Und waz die obgenanten unsere rete also teidingen, handeln und beslieszen, daz wollen wir kunig Ruprecht und herczog Hans obgenant stete halten und follenfuren, ungeverlichen. Urkunde disz brieffs, versigelt mit unsern uffgetruckten insigeln, der geben ist zu Heidelberg nach Crists geburte vierczehenhundert iare und darnach in dem sechsten iare, unser kunig Ruprechts riche in dem sechsten iare. Ad mandatum domini regis Job Vener etcetera.