Demutige beuelunge vnd willigen dinst tzu all euwer konynglichen behegelichekeit beuor ♦ Allirdurchluchste forstynne grossmechtige genedige frowe in dem letzten briffeN den vns euwer grossmechtikeit by desem bewiser hat gesandt begeret ir das der tag det tzu Calmarn vorramet ist tzu halden von den euwern vnd den vnsern gehalden wurde tzu dem Oressunde vmb gemaches vnd andir sachen wille hochmechtige gnedige frawe wir haben die selbe euwer begerunge vnsern gebitigern vorbracht vnd mit in do von geredt vnd ir allir meynunge ist synt das der tag vorramet vnd vorbrifet ist tzu Calmarn tzu halden do hen die vnsern gesichert synt vnd nyrne andirswo zo dunket sie mogelich das man in tzu Calmar halde vnd nicht an eyne andir stat lege dorumb zo bitten wir euwer allirdurchluchtikeit das is ouch euwer wille sy das her tzu Calmarn gehalden werde alz is von beyderseit ist vorschreben wend wir vnsere sendeboten ouch do hyn wellen schicken die euwer grosmechtikeit vnsers willen volkomelich vndirrichten sullen sunderlich als euwer hochwirdikeit begeret das wir selben komen welden tzu der wirtschafft des hochgeborn konyges Erichs euwirs sones grosmechtige vnd gnedige frowe wir danken flisslich euwern gnoden das ir vns geruchet do tzu tzu laden vnd alleyne wir wol eynen guten willen dor tzu hetten zo sy wir doch vorhindert von mancherley gebrechenA vnd schelungen das wirs mit nichte gethun mogen vnd bitten euwir durchluchtikeit als vnser gnedige frowe das ir vns das nicht vor arg haben wellet ♦ Gegeben uff vnserm husze Marienburg am sontage noch sent Petir vnd Pauli tage.