Wir bruder Conrad von Iungingen homeister dutsch ordens thun kunt vnd offenbar allen den desser briff vorbracht wirt das wir mit rathe vnser gebitiger die erbarn geistlichen vnsers ordens bruder vnd vnsere liben getruwen hir nach geschreben grafe Iohan von Seyn kompthur czur Balge Frederich von Wallenrode kompthur czur Mewe Albrecht Ruthe burgermeister czu Thorun vnd Iohan von Thorun burgermeister czum Elbinge gesant haben vnd mit voller macht senden off den tag der czu Calmarn vorramet ist czu halden mit den allirdurchluchsten forstynnen frowen Margarethe koningynne czu Denemarke etc als vmb das land Gotland vnd vmb die stat Wysbu vnd was die vorgenannte vnsere sendebothen mit der vorgeschreben frowen konigynne ader iren volmechtigen sendebothen entrichten ader enden mogen vmb das vorgeschreben land vnd stat vnd in allen andern sachen is sey nach rechte nach mynne ader nach fruntschaft ader in welchirley andern beqwemen wyze sie das eyntrechticlich vnd ane gefeer gethun mogen das sollen sie volle macht haben vnd geloben das mit craft deses brifes stete vnd veste czu halden bey guten truwen ♦ Czu merer sicherheit vnd getzugnisse desser vorgeschreben dinge haben wir vnser ingesigel an dessen briff lassen hengen der gegeben ist off vnserm huse Cristburg am dinstage noch Petri ad uincula im xiiiic vnd vi^ten iare.