Demutige beuelunge etcetera ♦ Allerdurchluchste furstynne grosmechtige gnedige frauwe euwer hochwirdikeit brieffe N inhaldende vnder andern worten wir ir gerne seget daz die vnsern mit voller macht vmb Gotland vnd Wysbu in den Orsunt czu Halzenburg czwisschen paschen vnd pfingesten ader vff pfingsten quemen haben wir wol vornomen vnd thun czu wissen euwer hochwirdigen gnade das off deze czeit als euwer bothe mit euwerm briffe czu vns quam etliche vnser gebitiger bei vns woren ydoch zo woren vnser stete vnd ouch etliche vnser gebitiger die vormols alle wege in den sachen vnd teidingen sint gewest czu desser czeit nicht bei vns ouch kunden wir sie zo schire czu vns nicht vorbotthen durch ander geschefte wille die sie vor henden haben alzo nomen wir euwer grosmechtikeit boten vor vns vnd fragten in ab her mochte eyne czeit harren bis off den ersten sontag in der vasten off den selbigen tag haben wir vnser gebitiger vnd stete den die sachen wissentlich synt czu vns geladen zo wellen wir euwern gnaden off euwer begerunge vnser meynunge vnd willen schreibenN ♦ Dor off antwerte her euwer hochmechtikeit hette im beuolen als ir ouch in euwerm briue berurt das her vorlassen vnd vngesumet weder eyne antwert brengen solde dorumme allerdurchluchste forstynne vnd gnedige frawe bitten wir euwer hochwirdikeit daz ir nicht vor obel noch in arge nemen wellet das wir euch off deze czeit keyne entliche antwert scheibben sunder off den vorgeschreben ersten sontag in der vasten wen vnser gebitiger vnd stete czu vns komen wellen wir euwern gnaden off euwer begerunge vnsern willen vnd meynunge bei vnserm eigen boten eygentlich vnd wol vor schriben ♦ Gegeben off vnserm huse Marienburg am montage vor conversionis Pauli im viiden iar.