Dit is de schade unde unrecht, dat unser leuen vrouwen unde moeder koningin Magareten unde uns unde unsen denren unde undersaten gescheen unde daen is van deme hertogen unde van der hertoginnen to Sleswick unde van den greuen to Holsten unde eren denren unde eren undersaten.

<1> Primo dat vrouw Anna van Zeegarden heft von my Ieppe Ywersson genomen ♦ To dem ersten unse rechte erue in Alzen unde in Zuntwyd, dat se van my genomen heft enen hoff de heet Holbeke de renthet alle iar i laast kornes unde xliiii artich kornes unde ock holt dat men my mid welde vore entholt an enem veligen lanturede.♦ Item is myner suster genomen van Zeegarden xxiiii punt englischer unde xxiiii ossen unde vii zadelde perde an enen veligen lantvrede.♦ Item nemen de van Zeegarden Nisse Boddesson mynen lansten van mynem gude und setteden ene uppe ere gud unde leden myn gut wuste.♦ Item heft vor Anna houwen laten myne holte unde schaden dan uppe hundert mark unde dar enbouen. Item venget her Otto Zeestede mynen lansten unde sluch ene an den staken to Sunderborg unde schattede em aff xx lubesche mark an enem veligen lantvrede.

<2> Dat is de schade de to Stubbe scheen is. To dem ersten nam Tabbendorpp den lansten ere perde unde ere koye unde ere ossen mid unrechte de se van em losen moesten vor veftich mark. Item dar enbouen ene bede van der houe unde de bede lepp upp hundert mark. Item worden her Anders Iekeppsson to Stubbe genomen iiii perde uth vorberten (!) houe Kotelberges vnde uth eren brode also gud also veftich mark. Item heft her Wulff Pogewisch dren lansten afgenomen vi mese haueren unde heft se ge enghet tø houedenste unde heft enen geuangen de Erick geheten is unde heft sinen vader voriaget wedder got unde wedder recht. Item nam her Wulff van iewelken lansten ene drage vuders halff roggen unde halff haueren van seuen dorppen. Item so heft he se begasted mid xx perden. Des suluen gelik dede ock Marquard Ronnouwe unde her Thunne. Item so leeth vor Berta Kotelberges ut erem brode unde int erem brode vuderen her Anders Iekoppssons korne to Stubbe meer den uppe xxiiii heytschepel kornes.

<3> Item na godes bort xiiiic iar in deme negeden iare des dinxesdages negest na miduasten do ward my schipper Iens Waaes borger to Nuborge myn gut afgenomen mid unrechte by ghenne syk der Kyleruorde unde ik schepede myn gut upp unde weste anders nicht ane ik enscholde myn gut vor thollen unde dar mede scholde myn gut vry wesen in aller mathe. To dem ersten neme se uns xii perde also gut also lx lubesch mark. Item iɉ thunnen boteren vor viiɉ mark. Item ene thunnen talges vor v lubesche mark. Item ene thunnen smaltes vor iii lubesche mark. Item en verendel boteren also gut also en punt lubesch. Item ii schipp boteren vor xxiiii {skilling}. Item ii lb. wlesches also gut also iiii mark lubesch. Item ii stucke talges unde boteren dar tø also gut also vi lubesche mark. Item enen ketel unde enen gropen also gut also xxiiii {skilling} lubesch. Item ii gropen unde ene kannen also gut also x {skilling} lubesch. Item alle unse bedde cleyder also gut also vi mark lubesch. Item enen bot unde enen ancker also gut also iii mark lubesch. Item ene kysten also gut alse ene mark mid deme dat dar inne was. Dit vorescreuen gut nam uns de prouest van Poretze unde antwordet deme greuen unde kunde nichten unses heren des koninges gnaden dat uns dat unse mochte wedder werden.Summa istius c mark v mark et x {skilling} lubesch.

<4> Dit is dat gut dat Yesse Naal vnde Gereke Scroder unde andere borgere van Aleborge vorloren in deme lande to Holsten by dem Vemers sunde ♦ To deme ersten en perd unde koo vlech hode unde talch boteren unde honnich unde schappuel unde kopper under ander kopmansware mid deme schepe dat se ock vorloren.♦ Dit vorscreuen gud nam Keye Rantzowe unde Luder Langelouwe ock sede greue Hinric unde de hertoghinne van Sleswick unser gnedigen vrouwen koningin Margareten dit gut wedder to schippende unde dar en ward nicht aff. Summa iiiic lubesche mark.

<5> Dyt is dat gud dat der herthoginnen dener genomen hebbet den borgern van Horsenes unde de dat ghenomen hebbet de hetet aldus Keye Rantzowe Luder Langlowe Gotzik Rantzow. Tho deme ersten nemen ze Mickel Nielson unde Dauite xxiii tunne bøteren xix øssen viii tunnen rintflesches ii scippunt talges xv ossen hude unde køhude olt kopper zo gud alze vi lubesche mark kysten unde kledere alzo gud alzo xx lubesche mark unde in gud scip heel unde beholden zo gud alzo xl lubesche mark mit al zyner thobyhoringen.♦ Dyt gud wart ghenomen ut enemen helen schepe unde byholden schepe unde unvorbroken an ienigerleie mate. Summa iic mark unde lxxxviii mark.

<6> Dyt is dat gud dat de Holsten nomen hebben mit unrechte ♦ Tho deme ersten zo nam her Wlf Pogwische Nikkels Lawesøne enen borger van Asnes ossen alzo gud alze x lodige mark. Item Iohan van Siggem tø Dame de nam Nikkels Anderson upper vrien herstrate enen ossen zo gud alze iiii lubesche mark.♦ Item her Herdingk Stake bischattede Nikkels Pederson enen borger tho Asnes uppe xxiiii {skilling} lubesch. Item Henneke Stake de dede Tuke Anderson in zinen perden schaden uppe xx lubesche mark nu in der vasten. Item Børchart Krummedik de nam van Ieppen Mieler(!) eyn borger to Asnisse eyn pert zo gud alzo vi lubesche mark unde ii muder perde zo gud alzo vi mark. Item nam her Otte Zeste Nickels Tomasson van Asnes haringk unde ander gud alzo gud alzo xxx lubesche mark. Item Henneke Stake rouede Symen van Warden xiii ossen iwelken zo gud alze v lubesche mark.Summa iɉc unde xɉ mark.

<7> Dyt is de sculdeginne de her Iohan Scarpenberch heft tho Clawes Snaffs ♦ Tho deme erste zo vengk he zynen lansten unde zynen knecht unde sette ene in den stok unde an yssern tø Vlensborch unde tø Hardersleue unde schattede em af vic lubesche mark unde der hertøginnen rat de vunden man her Iohanne tø mit unrechte. Summa vic mark.

<8> Dyt is de sculdeginne de her Erik Nickelson heft tø Sletzen der hertøginnen man ♦ Tø deme ersten zo grep Sletzen twe deue de hadden her Erik Nickelson stølen iiii perde zo gud alzo hundert mark de ene def de wart ghe henget unde de andere de untquam unde dar vøre byhelt Sletzen dat ene pert unde de anderen dre de heft he dan tø borge. Summa c mark.

<9> Dyt is de sculdeginne de her Nisse Ywerson heft tø der hertøginnen van Sleswik unde tø eren lansten unde tø her Erike Krummedike ♦ Tho deme ersten desse vi de hir na screuen stad alzo Henneke Worm Hinik Wortsson Clawes Iul Ions Gudeson Henneke Peder Litlesson desse søsse de bunden Ieppe Duen myner vrowen lansten uppe der Trea in zyneme egene hus alzo oft he wezen hadde eyn def vor ii rade de zine egene weren unde scotten zine døre uppe. Dyt is welde

<10> Item gingen desuluen in Backen Tzyensones huze in der grift unde breken up zine doren mit welde unde mit wolt unde wolde ene unde zinen søne doot geslagen hebben unde moste zyn egene hus rumen unde lopen tø lopen tø (!) holte. Dyt ok welde

<11> Item des sondages vor sunte Laurencius dage do quam Magnus Hayson unde zyn sone zulf verde do der Treya unde stotte dar ere hus up unde at er brod unde drank er ber ane eren dank unde slech ze. Dit ys welde

<12> Item zo reeden de van Gotdorp ut in myner vrowen gud tø Swezen unde redden zuluen mit em unde nemen van ym alzo vele alzo ze zuluen wolden. Dyt ok welde

<13> Item tø der tyd do Henneke Stampe Swafstede ynne hadde do sloge ze mynen knecht Clawes Lucke unde wunden ene myt dotliken wunden ♦ Dat deden de von Ostenuelde uppe dinge dar my nicht en gud wort weder vor schude unde howe zyne armborste eyn twey dar ik em moste na bytalen.♦ Dat deden der herthoginnen lantsten. Dyt is dingvrede

<14> Item in myner vrowen egen holte de wundeden ze mynen knecht Yessen Palnesson darumme dat he ze hinderen wolden wente tø rechte ♦ Dar krech ik ok nicht en gud wort vore.

<15> Item in deme wynter do de Vrezen weren vor Swafstede unde wolde dat hebben bystalt do untvorden de van deme Stapelholm myner vrowen ere vangenen de er mochten geuen hebben duzent mark eder mer unde ik was erer liues unde gudes velich unde menede dat ze weren komen op myner vrowen besten. Summa mille marks

<16> Item de van Ramstede de helden unde huzeden myne stølen perde unde de gad alle daghe mit deme ergesten umme mit den Vrezen.

<17> Item hebbet myner vrowen lansten claget vore my dat Tymme Meinerstorpe hebbe gheheten der hertoginnen lansten dat ze scølen howen myner vrowen der koninginnen holt unde vorkopent wech zunder brøke unde myner vrowen lansten de scolen des nicht doen.

<18> Item heft Tymme Meinerstorpe vorbøde dat neman scal liggen uppe myner vrowen valkenlegge dat er alle yar tø gherekent unde tø ghescreuen is vor x lubesche mark unde is ere rechte pant unde drowet den armen luden he wille em beide hende unde vøte aff howen eft ze dar up komen unde de biscop van Sleswick de gink des tø rechte tø Plone unde umme den haluen molen stroem tø Huzem unde ok umme de brugge tø Tzule brø unde ok umme dat holt unde umme de iacht to Gozholt dar zetten ze op duzent lodige mark tø brøke dar gude breue oppe geuen zint unde wat ut desme vorscreuen gude is uppe bored tø Gottorpe alzo lange alzo de biscope zuluen Svafstede hadde in zinen weren dat vorseten is unde ok wat uppe oppe boret is zedder der tyd dat myn vrowe de koninginne Swafstede krech dat borede er tø ok wat de hertoge heft oppe ghebored vor der tyd ere se worden vorscheden tø Plone dat he hadde oppe børet mit wolt unde mit welde dat vorseten is.♦ Ok desser zake is de biscop recht worden tø Rome unde vor deme romeschen koninghe ok hebbet ze ze nu vorscheden in mynne unde in vruntscop den hertogen unde den biscop wat den en twischen was tø Plone van dessen vorscreuen stucken unde wilkorede uppe duzent lødige mark we des nichten helde unde myn vrowe unberet des wat er boret van dessen vorscreuen stucken. Summa xx mark in twen iaren

<19> Item Erik Ienson de vor hurede myner vrowen pram enem van der hertøginnen lansten de hed Herder Luder unde de nam de vrucht in by Swafstede bette tø Rendesborch ♦ Do quam Clawes Raven unde sculdegede eynen vruchtman in dem pram de Ieppe gheheten is unde nam em zin gud unde den pram mede unde heft ene zedder biholden unde den pram kan myn vrowe noch nicht weder krigen unde dar umme hebbe ik enen somer tø schaden nomen xl mark unde mer. Summa c mark

<20> Item lepen der hertoghinnen lansten van Ramstede mit vorrade vor Swauestedehus unde wolden doetslagen heben myne knechte sunder broke unde dar schude my edder en nü en gut word vore

<21> Item hebbet de suluen lude my schadet an mynem korne bynnen enem iare xvi thunnen ghersten. Summa viii mark

<22> Item hebbet de suluen lude sind der tiid dat ik em betalede ere korne tø Suauestede do lepen se mit eren armborsten unde cletzen unde iageden myner knechte perde van myner vrouwen eghene graze unde slugen ere klouere in allen stucken.

<23> Item do nemen de lude van Ostenuelde mynen wagen unde roueden den upper rechter herstraten unde dar was gut uppe also gut also xl mark unde voreden dat in tø Ostenuelde bynnen enen veligen vrede unde nemen dem knechte sin perd unde sinen rok unde wolden ene hebben also enen deef sunder recht. Summa xl mark

<24> Item Hinrik Kellerknecht unde Hans Kale de vengen myner vrouwen lansten tø Hiddinge de heeth Peter Petersson unde bunden ene also enen deef an sinem eghenen hus unde an myner vrouwen rechticheid sunder alle broke.

<25> Item Thymmo Meynerstorpp de vengen myner vrouwen lansten uppe sinem eghenen ackere unde nam sin perd unde sette ene an den stok unde steyd noch an borge hande. Summa x mark {penning}

<26> Item de sulue Tymmo de nam Henneken Ockenson xviii {skilling} lubesch dem em Susterboke schuldich was tø Sleswick. Summa xviii {skilling}

<27> Item Hinrik Sparge myner vrouwen lanste van der Treya de was tø Swauestede unde clagede dat de sulue Thymmo unde hern Erikes knechte stotten ene unde slugen ene unde wolden ene unde sinen sone steken hebben an sinen eghenen øuen unde wolden dar vur vore bot hebben do bath Laurencius Heesten dar vore dat id nichten schude.

<28> Item so heft Merten van Rodemisse unde Ywen Ioonsson wesen vor Erik Ionsson hebbet claget dat her Erik Krummedik sende en boden dat se scholden komen tø em Husum unde schulgede de unde both en dat se dat zoltwerk dat de vluth gedreuen hadde van der hertoghinnen rechticheid tø myner vrouwen der koninghinnen rechticheid unde dat se dat scholden wedder gheuen dar seden see neen thø unde seden se weren nicht mechtich unde were myner vrouwen rechticheid unde ere rechte gut.♦ Dar antworde her Erik Krummedike also wedder tho dat se dat wedder gheuen scholden edder en scholde unlucke scheen edder he wolde se binden upp eren eghenen bedde.

<29> Item so helet unde huset de herthoghinne Henneken Stampe. Unde see secht he sy er undersate unde mach des nicht laten. Se gheuen em ere brot unde he is my worden an rechter rekenschopp van myner vrouwen der koninghinnen wegene truwelos unde kan des nichte krygen und he heft myner vrouwen gut unde penninge uppe boret.

<30> Item Boo Ghunnesson van Wisken heft my claget dat Witte Zyrek van Witbeke heft em mit unrechte afgedungen ene eed tø dunde sulff twelfte dat he dun schal tø Husum dat nü en recht was men he scholde dat dun tø siner kerpel kerken also in deme lande recht is.

<31> Item heft her Erik Krummedik screuen an de Vresen de ik in den weren hebben van myner vrouwen der koninghinnen wegene dat se my nichtes dun schølen van miner vrouwen wegen unde scholet my nenerleye recht dun.

<32> Item dit is dat gut dat hern Nicolaus van Aleuelde genomen heft den borgeren van Ødenzee ♦ To dem ersten van Drewese xiiii perde also gut also lvii lubesche mark. Summa lvii mark

<33> Item her Esborn Thagesson schattede Drewese unde sinem brodere aff also gut also xxxx mark. Summa xxxx lubische mark {penning}

<34> Item nam de hertoge unde sine denre enem borgeren van Odenzee ver sunerke hentzte also gut also c mark unde xx mark. Summa hundert mark unde xx mark

<35> Item desse schulginge heft Thomas Inwersson van Kolingen tø hern Otto Zeestede ♦ Primo dat he em heft genomen sin gut mid unrechte unde heft dat em dicke secht wedder tøgheuende vor myner vrouwen der koninghinnen unde dem hertighen unde sedder der tiid dat id em ward wedder secht tøgheuende so heft he vorthered xl lubesche mark de wile he reeth tusschen dem hertogen unde her Otto Zeesteden unde kunde nichtes wedder krygen unde alle de anderen de ere gut hadden uppe der schuten de kregen alle ere gut wedder dar umme dat se weren uth dem hertørike unde he kunde nichtes krygen. Summa xl mark {penning}

<36> Item Clawes Rauen vengen Ghuse unsen denre unde nam em sin gut in perden in cledere unde in gesmutze also vc mark. Summa vc mark

<37> Item de sulue Clawes Rauen vengen unse denre Wilhelm van Espen unde Wilhelm Schonenberge unsen syden neyger unde nam en an reden penningen hundert unde xii kronen unde dar thø also gut gut also l nobelen unde dar tho de koste dat id en kostede er se loos worden l nobelen. Summa c kronerde unde xii kronerde unde c nobelen

<38> Item nam de sulue Clawes Raues knecht unsem denre Iaspar Finsson sin schryn dar xxiii mark lubesch inne weren unde x gulden vingeren unde en gulden spaen unde in dem sulue schryne legen unse breue unde dat is uns gesecht dat he de vorbrant heft. Summa totalis ex parte Nicolai Rauen viiic mark xc mark et ix mark

<39> Item so sande unse leue vrouwe unde moder koninghinnen Margarete xiic mark unde xiii mark tobetalende tø Lubeke unde de hadde Gysebrecht ere denre de mester Gherdes mach was de quam mit den penningen tø der Borge in Vemeren unde bleff daer doet unde de greue leeth de penninge upnemem unde heft dar neen lyk vore dan unser leuen vrouwen unde moder vorscreuen. Summa xiic mark unde xiii mark

<40> Item heft de hertøghinne laten vangen Peter Aktorppen unser vorbenomeden leuen vrouwen unde moder koninginnen Margareten knecht dem wi loueden vruntschopp unde ghut in iegenwardicheid unser vorscreuen leuen vrouwen unde moder unde mennigen guden mannes.

<41> Item entholt de hertøghinne her Ions Finkenowe siner husurouwen gut vore to Kettinge in Alsen dat ene last kornes tø renthe gift unde dat gut ward erem vader Hinric Daa tø pande seth van hertøgen Hinric vor l lubesche mark. Summa l mark {penning}

<42> Item entholt de hertøghinne den suluen her Ions Finkenowe sin gut vore to Luzappele dat viii artich kornes tø renthe gift unde tø Langeberges marke ock viii artich kornes tø renthe gift unde to Bylstorppe v øre kornes tø renthe. Dit vorbenomede gut ward her Ions Finkenouwen husurouwen eren vor elleren tø pande seth van hertogen Wolmer tø Sunderiutlande vor lxxv mark lubesch. Summa lxxv mark

<43> Item heft her Otto Zeestede gekoft en deel gudes in her Ions Finkenouwen husurouwen rechte vader erue. dat heft he dan bynnen des dat myn vrouwe de koningin hadde em beualen dat he scolde weten her Ions Finkenowen beste in aller mathe.

<44> Item so dede myn vrouw de koningin Margarete Peter Aktorppen hundert lubesche mark de scolde he betalet hebben Clawese Leembeken van erer weghene vnde tø der tid do Peter Aktorpp geuangen ward do worden em de c mark genomen. Summa c mark {penning}

<45> Witlik schal wesen dat her Erik des bisscoppes official in dem Sunderherde in Fune also he stund des sondages in siner kerken unde sang missen in der tid alse he godes lichnam upheelt unde neen volk was uppe dem kerkhoue do quam en deef unde stal em sin perd also gut alse x lubesche mark.♦ Na dem perde sochte he unde vant id an Laurencius Heesten houe tø dem Nyenhus unde em kunde nicht wedderuaren men lose word unde slege unde kunde sin perd nicht wedder krygen unde men lede em dat thø dat he en vorspeyer were doch hadde des bisschoppes breff van Fune mit sik.Summa x mark {penning}

<46> Item nemen de van Plone alse Clawes Rauen van Lylle Munkes knechte xix ossen also gut also c mark unde en perd also gut also vi mark unde vi lubesche mark in reden penningen unde de hertoge sede bisschoppe Boo dat gut wedder unde krech nichtes wedder. Summa c mark unde xii mark

<47> Item nam her Erik Krummedik Esghe Thammeson ii ossen unde reeth vort an sines lansten hus unde nam em al sin gut unde nam ock van sinem lansten iiii ossen unde schatte ock van sinem lansten iiii thunnen beers.

<48> Item vrouw Anna van Zeegarden holt em sin gut vore mit welde. Summa c mark unde xxxix mark

<49> Item tø der tid do her Iohan Thammesson hadde Koldinge inne do nam greue Albrecht xlv ossen unde v koye unde sluch de tø Segeberg. Summa iic mark

<50> Item nam her Iohan Mølteken husurouwe en schipp vul mit køpenschopp van Peter Smede enen borger tø Buknes. Summa iiiic mark

<51> Item nam Marquard van Siggem en schipp vul mit kopenschopp van Lange Anders enen borger tø Middeluare unde is schipher unde uppe deme suluen schepe hadde her Berneke Schinkel en beer. Summa iiic mark {penning}

<52> Item heft [he]r Schacco Rantzouwe den hagen tø Grøbe mit siner tøbehoringe dar Rikman van der Lancken gude breue upp heft unde kan der nichte neten unde wo id dar met vurder mer umme schapen is dat kan he em wol berichten kan em recht scheen.

<53> Item Lodewich Barsbeke claget dat sinem vader was en gut tøpande seth dat heth Warnes mit der mølen tø Blaa unde ander tøbehoringe van hertogen Wolmer hertogen tø Sleswick unde iunchere Wolmer sinem sone vor iiiic mark an lodeghemen suluer unde vi lodege mark unde x schillinge engelsch ♦ Dar heft he gude breue upp mid des vorscreuenen hertogen Wolmers unde sines sones ingesegele besegelt unde he heft dar dicke umme sproken unde em kunde nen recht wedderuaren.♦ Dit vorscreuen gut hadde sin uader in sinen weren xl iar unde noch mer dar na wart id em genomen tø der tid dø he was in koning Wolmers denste.

<54> Item dit is de clage der van Nakschowe ♦ Primo claget Hinric Mertensson dat Schacco Zeestede hinderde em sin schipp dat he dat nicht redden møste tø Holstede in Zwantze mit rettschope unde mit thouwe ♦ dat was beter den xl mark.♦ Uppe dem suluen schepe vorlos de sulue Hinric unde andere bedderue lude ere gut beter den c mark unde vi lubesche mark ane dat schipp alse vorscreuen is. Summa xl mark et c mark et vi mark

<55> Item nam her Bendictus uan Aluelde Mattes Petersson unde Lasse Petersson borgeren tø Nakscouwe in der Kyler vorder umme nenerleye sake willen men dat ere schip reeth vore sinem a[n]ckere unde in dem waterualle also dat id stut dat gut was beter wen lxxxvii mark ane alle eren schaden unde theringe unde koste de se dar upp gedregen hebben. Summa iic mark xxxi mark

<56> Item desse sind gerouet van Laurencius Heesten an enem veligen lanturede de mit der vrowen der koningin lansten sin unde upp ener vryen straten ♦ Primo Sønneke Modersson vi thunnen soltes ♦ Item Nickels Bunsson ii thunnen soltes ♦ Item Nisse Ywersson in der Enghe ii thunnen soltes.

<57> Item Peter Bunsson xxvi punt engelsch de heft em her Erik Krummedik afgeschattet. Item Boo Nickelsson vii punt engelsch item Haneke Poonsson ii thunnen boteren unde iiii punt engelschunde mennigerleye ander unrecht dat en geschen is unde vele andere lude de nu nicht komen dørsten unde clagen. Summa iɉc mark et iiii mark

<58> Item desse sind ock beschattet van her Erik Krummedike ♦ Primo Sywerd Bandikson sinem sonen ward afgeschattet xl punt engelsch ♦ Item Fedder Brodersson xxix punt engelsch unde nam van em al sin gut dat he an sinem hus hadde ♦ Item tø Pylwerbingh van Hans Scrodere an queke xxvii ossen unde ii perde unde de ossen unde perde weren also gut also lii lubesche mark. Summa iiic mark x mark ock xii {skilling}

<59> Item heft he vordreuen wol druttich hysche lude de weghe varen sin mit wyue unde mit kynde in Vreschlande ♦ Item leth he Poppen Mammesson doetslan uppe sinen eghenen gude sunder rede unde sunder recht unde sin sustersone ward geschoten dorch dat lyff umme sines eghenen gudes willen.

<60> Item ik her Law Uren en ridder schulge Hartich Porsuelden dat he my vore entholt mynen høff de heeth Steenbergegarden unde ene mølen unde ander gut dat dar tø licht mit allem tøbehoringe mit unrechte unde enen anderen hoff de heth Gamelgarde de in Angelen belegen sind.♦ Desse gut heft he my unde mynen vorelderen mer denne xl iar vore entholden mit unrechte. Summa vc mark

<61> Item schulge ik her Lawe Uren Clawes Breyde vor enen hoff de heeth Gronenbergegarde mit alle siner tøbehoringe unde ander gut dat in Suntwyt belegen is ♦ Dat gut heft he my unde mynen vorelderen vore entholden mer den xl iar mit unrechte.

<62> Item gnedige here dit is de schade den iuwe arme borgere van Rypen genomen heben in deme hertochrike tø Sleswick unde in deme lande tø Holsten ♦ Primo sedder der tiid dat de lanturede ward gesworen unde bebreuet tø Coldinge so nam Laurens Heesten unde sine volgere van Thuly Rikkelsson xviii perde ock van anderen unsen borgeren de perde wolde se noden gheuen heben vor hundert mark unde xx. Summa c mark et xx mark

<63> Item greue Hinric nam li ossen van Helmige van dem Hagen unde van sinen stalbrøderen dar wissede he em vore beschedenne penninge unde heft em gheuen sinen oppenen breff darupp unde de arme man heft dicke reden na greuen Hinric unde heft sine penningen esschet unde kan der nicht krygen ock wil he sinen oppenen breff nicht holden. Summa c mark et x mark

<64> Item nam greue Hinric unde greue Albrecht xxxiiii ossen van twen armen borgeren alse Ieppe Uluesson unde Ezeghe Clawesson unde de sind des arme lude worden unde kunden nü lyk edder recht dar vore krygen. SummaA

<65> Item her Erik Krummendik nam ii ossen van enem armen man de heth Wyrek Poppsson unde de heft he an nener mathe vorbroken. SummaA

<66> Item des hertogen voget tø Breestede Magnus Haysson de nam enen armen borgeren de heth Harre Fryse also gut also xl mark dar tø vorede he ene tø Gottorppe in stok vnde in ysern unde er he kunde komen uth dem stocke dø møste he gheuen hern Erike i perd also gut also xvii mark.

<67> Iten en van unsen borgeren de heth Broder Modersson de claget ouer her Erik Krummedike dat he em afschattede x punt engelsch mit unrechte. Summa vic et xlix mark viii {skilling}

<68> Item dat is de clage de Gerwin Stromberger de en begheuen man is in des hilligen geestes huse tø Preestø claget ouer Arnd Heesten ♦ Primo dat he nam em ii perde dat ene was en thellene perd dat ander was en drauende perd de twe perde unde want unde rede penninge de he em nam de weren also gut also lx lubesche mark.♦ Item so gaff he Arnde ene thunne boteren de kostede em wol x lubesche mark ere he se em dar schippen kunden dar he se heben wolde.♦ Item schal he Arnde gheuen xl lubesche mark edder schal ock in den staken inkomen tusschen dyt unde sunte Michelis dage de nu negest kumpt. Summa c mark et x mark

Summa totalis ixm mark

Desse schade de is bouen eerde unde gut unde wat dat gut scholde renthet hebben sedder der tyd dat id mid unrechte vore entholden is unde ock ane dat dat genomen is uth eren eghenen husen unde houen unde dat is nichte summet unde ock ane de welde unde dingurede de gescheen is unde ock ane den schaden de van dessem geschaden vort gekomen is alse koste theringe unde vorsumnisse de se genomen hebbet de ghenen den desse schade scheen is.