Ik Ywen Bruzeke, ritter. Bekenne vnde betuge openbare vor alsweme, dat alle ansprake, vnwille vnde twedracht, de bet in dessen dach geweset sint twusschen Alue van der Heyde vnde my, gensliken vnde al vormiddest den erbaren mannen, her Tydeman Stene, hern Hermen Polinge, borgermesteren, hern Johanne Schonenberge vnde hern Hinrik Meelberge, radmannen to Lubeke, van dem rade darsulues vmme vruntliker endracht willen darto geuoget, vnde ok vnser beyder vrunden, alse hern Johann Tyzenhusen, ritter, vnde Hinrik Crumvote, van myner wegen, her Hinrik Schenkenberge vnde Johanne Nyenborge, van Alues wegen, vruntliken geulegen, satet vnde to ende vorenet sin, also dat ik vnde myne eruen dar in tokomenden tyden nummermer vp saken enscholen noch enwillen, noch nement van vnser wegen.

Scheget ok, dat God vorbede, dat Alff erbenomet edder sine eruen ofte yement van erer wegen vmme desser vorscreuenen zake willen in tokomenden tyden beschediget worden, darvan scholen vnde willen ik vnde myne eruen se gensliken van entheuen vnde benemen.

Vnde des to merer tuchnisse der warheit is myn ingesegel myt mynen willen vnde wetenheide gehenget vor dessen breff.

Datum anno Domini M^o CCCC^o XIII^oA, quarta feria post dominicam Invocavit.