Omnibus presens scriptum cernentibus Mathias Skapp villanus in Malmøyghe salutem in domino . ♦

Notum facio universis me ex venerabili capitulo Roskildensi curiam quamdam in Malmøyghe que wlgariter nominatur Strandgardhen a borientali parte . plathee communis sitam contiguam curie Martini Clawsson ab occidentali parte cum omnibus ejusdem curie pertinenciis nullis exceptis ad dies meos et uxoris mee Katerine quam pronunc habeo conductive accepisse cum condicionibus infrascriptis . videlicet quod ego et uxor mea predicta dictam curiam edificari . meliorari faciamus . ipsamque curiam in bono statu secundum nostram facultatem teneamus . et ipso predicto capitulo duodecim marchas argenti tempestive infra octavas epyphanie domini pro pensione de eadem curia annuatim Roskildis exsolvere teneamur nobis vero ambobus de medio sublatis . dicta curia cum edificiis et melioracionibus prout tunc invenitur . ad ipsum capitulum absque aliqua ulteriori protraccione libere revertatur ♦ Item quod liberi nostri quos habemus post nostrum obitum in conducendo dictam curiam pro competenti precio aliis preferantur . ♦ Item si quod absit aliquando in solvendo dictam pensionem . infra dictum terminum . defecerimus . extunc prefatum capitulum ipsam curiam una cum ipsius capituli littera aperta nobis super hoc data revocandi plenam habeat potestatem ♦

In cujus rei testimonium sigillum meum una cum sigillis virorum discretorum videlicet Achonis Jenisson et Clawes Villæ villanorum in Malmøyghe presentibus est appensum ♦

Datum anno domini millesimo quadringentesimo decimoquarto feria tercia proxima post dominicam quasi modo geniti ♦