Vruntlike grote, mit gunstiger begerunge heils und alles gudes in Gode, tovorn.

Ersamen heren und leven vrunde.

Juwe erbaricheit wille weten, dat in geledenen tiden, do men schref int jar unses heren MCCCXCI, do weren vor sendeboden ut gesand to Nowerden wards her Henrik van Flandern, her Godeke Kure, unses rades medekumpane, welke reise de kostede wedder und vort CCC mark XIV mark Rigesch XIV schilling Lubesch.

Hir up van unser wegen untfangen hevet de ersame man, her Johan Stoltevoet, XL mark Rigesch, also wi ene gemechtiget hadden, desse vorscreuene summa to untfande, und wi uns gansliken to eme vorlaten hadden, dit to vorderende.

Worumme, werden guden vrunde, bidde wi juwer ersamicheit, vlitliken begerende, eft hir jennige vortogeringe an gescheen is, dat dan juwe vorsichticheit dar up vordacht wille sin, was uns vorder van der vorschreuen summa, und dar wi recht to hebben, boren mach, dat uns dat werde, und scrivet uns ein antwerde, wes gi dar bi denken to donde.

Juwe ersame vorsichticheit spare God gesund to langen tiden.

Gescreuen int jar unses Heren XIV^c in dem XV jare, in sunte Gallen dage, under unses stades secrete.

Borgermeistere und raetmanne der stad Wysby up Godlande.