Vruntlike grote und heil in Gode tovorn.

Her Johan und her Henrik, gude sundergen vrunde.

Willet weten, dat wi enen brefA schreven an de gemeinen Liflandeschen stede, de hir bi gebunden is, dar in wi scriven umme de vorteringe, der wi van der Nowerdeschen reise noch tachter sint, welke summa is III^c mark XIV mark Rigesch XIV schilling Lubesch, dar up her Johan gi untfangen hebben van unser wegene XL mark Rigesch, de gi uns sanden.

Wor umme, leven vrunde, bidde wi juwer vor sichticheit vlitliken, dat gi wol willen doen umme unses vordenstes willen, und underwinden ju des arbeides, dat gi dessen vorscreuen bref vorderen und desse sake vort setten, wan dar ene vorgadderinge werd van der stede wegen.

Hir bewiset ju an, also wi ju wol to betruwen, dat wi gerne willen vorschulden, wor wi mogen.

In Gode moget wol.

Gescreuen an sunte Gallen dage, under unses stades secret.

Borgermeistere und raetmanne der stad Wysby, up Godlande.