Allirerwirdigster vater und sunderlicher lieber herre, und ersamen lieben, her compthur und her procurator etcetera.

Wir geben euch zu vorstehen, das der koning von Dennemark sich etlicher mosse wundirlich ken uns stellet, das wir aus etlichen beizeichen wol haben gemerket.

Nu hat her einen krieg angefangen mit den van Lubike.

Wir vorsehen uns, das her sich dor uf leichte vorlest, das es deme von Engelandt noch willen hat irgangen. Dovon ouch sicher ist zu vormuten, das villeichte die segelatie eine weile dirnedir werde legin.

Wann wir willen haben, ab wir ichtes wurden vornemen, das sich zum ergisten welde keren, das wir den unsern wellen vorbieten, das sie nicht segiln sullen, bis als lange, das sie gewisselich irfaren, wohin sich dese ding keren willen, und sicher segeln mogen.

So hat sich ouch der von Dennemark mit deme von Polen und herzoge Wytauden vorbunden, als ir ouch vor wol habet vornomen.

Hirum so bitten wir euch mit fleissiger begerunge, das ir diis in einer bequemen weise, nicht in einer klage, brenget an unsern herren, den Romischen koning, in demuticlichen bittende, das als von in seibin dem konige zu Dennemark, in bittende, das unsern orden im wellen lassen sein empfolen, und unser gnediger herr sein und bleiben.

Und fuget dis also, das wir dor inne nicht gemerket werden, sunder das unser herre, der Romische koning, als von eigener bewegunge schreibe, und sendet uns desselbigen brivis eine abeschrift.

Darane tut ir uns sunderlich zu danke.

Gegeben zu Danczk, am tage Priscae virginis, anno etcetera XVI^to.