Wy borgermestere vnde radmanne der stad Lubeke bekennen vnde betugen openbar in dessem breue, dat wij mit witscoppe vnde willen alle vnser medeborgere, mit wolbedachten mode vnde vrien willen van vnser vnde der gantzen menheid wegen to Lubeke vmme de schelinge vnde ansprake, de de irluchtigeste furste vnde here koning to Dennemarken menet to vns vnde vnser stad to hebbende, vnsen lonen gesat hebben bi de ersamen heren borgermestere vnde radmanne der stede Hamborch, Rozstoc, Stralessund, Luneborch, Wismer, Stetin vnde Gripeswold, alzo dat se vnser in allen vnsen saken na clage des vorscreuenen heren koninges vnde vnser antworde, vnde na vnser clage vnde des suluen heren koninges antworde, welker sik an dem rechten boret voretoghande, gentzliken to ere vnde to rechte scolen mechtich syn, vnde wes se mit rechte darane scheden, dat wille wij gentzliken vnde to ende holden.

Vnde des to merer bekantnisse is vnser stad ingeseghel gehenghet vor dessen breff.

Gegeuen vnde screuen na der bord Godes dusent veerhundert s{oe}steyn jare, des dinxedages to Vastelauende.