Vnsen vruntliken grut vnde wes wу gudes vormogen tovoren.

Leuen vrunde.

[.....]

Vortmer so heft de kopman van der Dudeschen hense in Norwegen liggende vele vor den steden claget, over dat etlike schipheren vnde koplude soken vnde segelen mit kopenschop to vorboden segelatie, de ok jegen des kopmans privilegia sint, vnde dat ok etlike leger holden, dar nijn liggen des kopmans wesen scholde, welke stucke dem menen kopman to groten vorvange sint, also de kopman vorscrenen den steden in Kopenhaven lesten vorgaddert vterliken to kennende geuen, welke stede eren rucgetoch do nemen mit eren raden to sprekende, der se antworde wedder bracht hebben vppe desse dachuart, vnde id is also van vns, dar mede byweset sint radessendeboden der stede in Prutzen mede vulbordende, besloten, engedregen, vnde ordiniret des, dat ene islike stad der hense kundigen schal eren burgeren vnde kopman, dat nemant schal segelen to Hidlande ofte Orkeney ofte to Bero, vnde ok nynerleye gelege maken ofte hebben in Norwegen anderswor wen to Nortbergen, Anslo vnde Tunsberch, dar de vriheide vnde gelege van oldinges wesen hebben vnde sint.

Weret dat jenich kopman efte schipher dat breke dat schip vnde gut schal vorvallen der stad, dar dat erstes to socht edder kumpt, vnde dat schal de stad strengeliken richten, vnde de schipher efte de kopman schal na dem dage nicht mer werdich wesen der vriheid des kopmans der Dudeschen hense.

Hirvmme bidde wy ju, leuen vrundes, mit vlite, dat gi desse raminge den juwen willen vorkundigen vnde to weten don, up dat se dar ninen schaden ouer nemen doruen.

Sijt Gode beuolen.

Screuen vnder der van Lubeke secret, des wi samentliken hirto bruken, an vnser Vrowen dach Assumcionis.

Radessendeboden der stede van der Dudeschen hense, nu tor tijd binnen Lubeke vorgaddert, vnde de raed to Lubeke.